Ózbekstan kásiplik awqamları Federaciyasınıń Qaraqalpaqstan Keńesi tárepinen “11-noyabr – Ózbekstan kásiplik awqamları kúni” bayramı qarsańında «Jańa Ózbekstan – Jańa kásiplik awqamları» súreni astında mádeniy-aǵartıwshılıq hámde qayır-saqawat ilajları ótkerilmekte.

Usı jıldıń 4-noyabr kúni Ózbekstan kásiplik awqamları Federaciyasınıń Qaraqalpaqstan Keńesi wákilleri hám kásiplik awqamları belsendeleri menen birgelikte Respublikalıq kóp tarmaqlı balalar medicina orayınan xabar alındı.

Ilajda Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov hám Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesiniń baslıǵı Z.Paluaniyazovalar qatnasıp, oraydıń medicina xızmetkerleri menen ushırastı hámde emlenip atırǵan balalardıń hal-jaǵdayları, sharayatları menen tanısıp, olar menen sáwbetlesti.

Respublikalıq kóp tarmaqlı balalar medicina orayı 335 orınǵa mólsherlengen bolıp, onda 416 xızmetkerler jumıs alıp barmaqta. Házirgi kúnde orayda 210 bala emlenbekte.

Ushırasıw dawamında medicina orayınıń bir qatar xızmetkerlerine kásiplik awqamlarınıń «Húrmet jarlıǵı» hámde emlenip atırǵan balalarǵa sawǵalar tapsırıldı.