13-sentyabr kúni Ózbekstan kásiplik awqamları Federaciyasınıń Qaraqalpaqstan Keńesinde “Hayallar dápteri”niń 5-basqıshında belgilengen wazıypalardıń orınlanıwı boyınsha videokonferenciya jıynalısı bolıp ótti. Usı videokonferenciyada barlıq rayon hám qala “Hayallar dápteri” boyınsha juwapkerler, prokuratura, Shańaraq hám hayal-qızlar komiteti, hákimlik, ishki isler bólimi, salıq inspekciyası wákiller hámde kásiplik awqam belsendileri qatnastı.

Jıynalısta shtab basshılarınan Ózbekstan kásiplik awqamları Federaciyasınıń Qaraqalpaqstan Keńesi baslıǵı Ulıqbek Jalmenov, Ózbekstan bilimlendiriw hám ilim xızmetkerleri kásiplik awqamı Respublikalıq Keńesi baslıǵı Ravshan Bedilovler sózge shıǵıp, orınlarda ótkerilgen úyreniwler nátiyjesinde anıqlanǵan kemshilikler hám jol qoyılıp atırǵan qáteliklerge toqtap óti. Atap aytqanda Nókis rayonında usı dápter boyınsha ámelge asırılǵan jumıslardıń qanaatlandırarlı emesligi, sonday-aq, Nukus qalasında úy-jaylardı ońlaw boyınsha jumıslar arqada qalıp atırǵanlıǵı, Ámiwdárya, Taqıyatas, Qanlıkól, Tórtkól, Ellikqala, Shomanay rayonlarında úy-jay menen támiyinlew hám ońlaw, isbilermenlik boyınsha kredit máseleleri, bir mártelik materiallıq járdem máseleleriniń orınlanıwında keshiktirilip atırǵanlıǵı sınǵa alındı. Kegeyli, Xojeli, Moynaq, Taxtakópir sıyaqlı kóplegen rayonlar “Hayallar dápteri” boyınsha ámelge asırılıp atırǵan jumıslaar analiz etilgeninde usı rayonlardaǵı jumıslar basqalarına qaraǵanda bir qatar jaqsı ekenligi aytıldı. Kemshiliklerge jol qoyıp atırǵan juwapkerlerge ámelge asırılıwı keshiktirip bolmaytuǵın anıq wazıypalar belgilep berildi.