Prezidentimizdiń baslaması menen 2020-jılı qabıl etilgen Nızamǵa muwapıq, 11-noyabr Kásiplik awqamları kúni dep belgilengen bolıp, derlik altı jıldan berli bul bayram elimizde keńnen belgilenip, miynetkeshlerdiń kewlinen tereń orın aldı. Ol xalıqtıń mehir-muhabbatı, minnetdarshılıǵı hám miynetkeshlerge bolǵan húrmet belgisi boldı.

Ózbekstan kásiplik awqamları Federaciyasınıń Qaraqalpaqstan Keńesi tárepinen usı jıldıń 3-noyabr kúni «Samir» restoranında «Jańa Ózbekstan – Jańa kásiplik awqamları» súreni astında saltanatlı bayram ilajı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan kásiplik awqamları Federaciyasınıń apparat baslıǵı Olimjon Saliev, Ózbekstan kásiplik awqamları Federaciyasınıń Qaraqalpaqstan Keńesiniń baslıǵı Uluǵbek Jalmenov, sonday-aq, respublika basshıları, miynet veteranları, kásiplik awqamlarınıń belsendileri hám jámiyechilik wákilleri qatnastı.

Ilajda shıǵıp sóylegenler kásiplik awqamlarınıń jámiyetimiz turmısındaǵı ornı, xızmetkerlerdiń máplerin qorǵawdaǵı juwapkershiligi, sociallıq turaqlılıq hám insan qádirin támiyinlew jolında ámelge asırılıp atırǵan jumıslarǵa joqarı baha berdi.

Atap ótilgenindey, keyingi jıllarda kásiplik awqamlarınıń jumısı isenimli hám xalıqshıl sistemaǵa aylanbaqta. Bul baǵdarda 2026-jıl on ay dawamında Ózbekstan kásiplik awqamları Federaciyasınıń Qaraqalpaqstan Keńesi tárepinen de kóplegen jumıslar ámelge asırıldı.

Sonıń ishinde, jámáát shártnamaları tiykarında kem támiyinlengen shańaraqlar, islewshi pensionerler, mayıplar,
hayal-qızlar hám jaslarǵa jámi 16 mıń 662 xızmetkerge, 7 mlrd. 559 mln. 403 mıń sum muǵdarında materiallıq járdem kórsetildi. Usı qarjınıń 4 mlrd. 197 mln. 870 mıń sumı kárxanalar esabınan, 3 mlrd. 361 mln.
532 mıń sumı bolsa kásiplik awqamları qarjılarınan ajıratıldı.

Ózbekstan kásiplik awqamları Federaciyasınıń Qaraqalpaqstan Keńesine yuridikalıq hám fizikalıq táreplerden jámi 477 múrájat kelip tústi. Nátiyjede 145 múrájat kásiplik awqamlarınıń usınısları hám sudlarda kórip shıǵılıwı nátiyjesinde tolıq qanaatlandırıldı. Sonıń menen birge, 292 múrájat boyınsha puqaralarǵa miynet huqıqları haqqında túsinikler berildi, 8 múrájat bolsa tiyisli wákillikli uyımlarǵa jiberildi. Bul processler nátiyjesinde múrájat etiwshilerdiń paydasına jámi 2 mlrd. 669 mln. 113 mıń sum miynet haqı hám oǵan teńlestirilgen tólemler, kompensaciyalar hám ruwxıy zıyanlar óndirip berildi.

Sonıń menen birge, sanatoriylerde sociallıq qamsızlandırıw qorı jollamaları esabınan 1999 jumısshı salamatlandırıldı, sonnan 76 jumısshı-xızmetker biypul jollamalar tiykarında dem aldı. Sonday-aq, kásiplik awqamlarınıń qarjıları esabınan 1753 jumısshı-xızmetker hám olardıń shańaraq aǵzaları salamatlandırıldı.

Ishki turizmdi rawajlandırıw maqsetinde ámelge asırılıp atırǵan «Ózbekstan boylap sayaxat et!» baǵdarlaması sheńberinde
8 mıń 935 xızmetker hám olardıń shańaraq aǵzalarınıń sayaxatları shólkemlestirildi. Sonnan Qaraqalpaqstan aymaǵındaǵı dıqqatqa ılayıq orınlarǵa 2 mıń 945, elimizdiń tariyxıy qalalarına bolsa
5 mıń 990 xızmetkerlerdiń sayaxatları shólkemlestirildi.
Bul maqsetlerge kásiplik awqamları esabınan 1 mlrd. 485 mln. 600 mıń sum, jumıs beriwshiler esabınan 1 mlrd. 99 mln. 100 mıń sum,
jámi 2 mlrd. 584 mln. 800 mıń sum qarjı jumsaldı.

Balalardıń jazǵı dem alıwı hám sawalandırıw jumıslarına ayrıqsha itibar qaratıldı. Respublikamızdaǵı 11 stacionar túrdegi dem alıw orınlarında jámi 7808 bala (sonnan, kásiplik awqamları esabınan 1748 bala, sociallıq reestrge kirgizilgen shańaraqlardıń ayrıqsha bahalarǵa oqıǵan perzentleri 4916 bala, hákimlik hám qáwenderler esabınan 1851 bala hám fizikalıq shaxslar tárepinen
130 bala) hámde 69 mádeniyat hám sport maydanshalarında
16750 jámi máwsim dawamında 24558 bala dem aldırıldı.

Ilaj sońında miynet pidayıları hám taraw belsendileri mámleketlik sıylıqlar hám húrmet jarlıqları menen sıylıqlandı. Olar eldiń rawajlanıwı, xalıqtıń abadanlıǵı hám miynetkeshlerdiń máplerin qorǵawdaǵı pidayı xızmetleri menen atap ótildi.

– Insan miyneti qádirlengen, onıń huqıqları menen mápleri isenimli qorǵalǵan jerde ǵana sociallıq ádillik, óz-ara isenim hám awızbirshilik bekkem qarar tabadı. Mine, usı iygilikli principlerdi turmısqa engiziwde kásiplik awqamlarınıń ornı hám juwapkershiligi sheksiz. Kóp jıllıq miynetlerim esapqa alınıp, «Ardaqlı nuranıy» kókirek belgisi menen sıylıqlanǵanım men ushın haqıyqıy bayram sawǵası boldı, — deydi tásirleri menen ortaqlasqan nuranıy Zinatdin Esenbaev.

Kórkem óner ǵayratkerleri tárepinen atqarılǵan qosıq hám ayaq oyınlar qatnasıwshılardıń kewillerin quwanıshqa toltırdı.