Til – milletti millet sıpatında saqlap qalıwshı eń tiykarǵı faktorlardan biri esaplanadı. Til arqalı xalıq óz ruwxıy dúnyasın, oy-pikirin, tariyxın hám mádeniyatın kórsetedi. Sonıń ushın, hár bir insan óz ana tilin jaqsı biliwi, oǵan húrmet penen qarawı, onı qádirlewi zárúr.
Elimizde til máselesine, ásirese, ózbek tiliniń mámleketlik til sıpatındaǵı statusına úlken itibar qaratılmaqta. Ullı oyshıl Alixontўra Soǵuniy óz shıǵarmalarında atap ótkenindey: «Adam ózligin umıtpawı ushın úsh nárseni qoldan jibermewi kerek: Oatanın, dinin hám tilin.» Bul pikir búgingi kúnde de óz áhmietin joǵaltpaǵan.
1989-jıl 21-oktyabrde ózbek tiline mámleketlik til statusı berilgen. Bul sáne tek ǵana elimiz tariyxında emes, al hár bir puqaranıń turmısında úlken áhmietke iye.
Usı múnásibet penen Ózbekstan kásiplik awqamları Federaciyasınıń Qaraqalpaqstan Keńesinde «Til – millettiń maqtanıshı» atamasında Máripat saatı shólkemlestirildi. Ilajda Respublikalıq ruwxıylıq hám aǵartıwshılıq orayı Nókis qalalıq bólimi xızmetkeri Gúlbáhár Sadıqova, Qaraqalpaqstan xalıq shayırı Abilqasım Ótepbergenov hám kásiplik awqamı belsendileri qatnastı.
Ilajda sózge shıqqanlar tildiń insan qálbinde, milliy ózlikti qáliplestiriwdegi roli haqqında pikir bildirdi. Til tek ǵana baylanıs quralı emes, al xalıqtıń tariyxı, búgini hám keleshegi, mádeniyatı hám ruwxıylıǵın óz ishine alǵan bay ruwxıylıq miyras ekeni atap ótildi.
– Maǵlıwmatlarǵa qaraǵanda, dúnyada 7000 ǵa shamalas til bar bolsa da, tek ǵana 200 ge shamalas tiller ǵana mámleketlik til statusına iye. Olardıń qatarında ózbek tiliniń de bar ekenligi – onıń ullılıǵın, sózge baylıǵın hám dúnya jámietshiliginde múnásip orınǵa iye ekenligin kórsetedi, – deydi Respublikalıq Ruwxıy-aǵartıwshılıq orayı Nókis qalalıq bóliminiń xızmetkeri Gulbaxor Sadikova.
Sonday-aq, Qaraqalpaqstan xalıq shayırı Abılqasım Ótepbergenov turmıslıq waqıyalardı aytıp beriw menen birge, tuwısqan xalıq tillerindegi qosıqları menen ilajdı jáne de bayıttı.
Máripat saatı qızǵın sóylesiw tárizinde ótti. Qatnasıwshılar tárepinen mámleketlik tildiń búgingi jaǵdayı, onı rawajlandırıw, til mádeniyatın arttırıw máseleleri boyınsha pikir-usınıslar bildirildi.