23-aprel kúni Ózbekstan kásiplik awqamları Federaciyasınıń Qaraqalpaqstan Keńesi tárepinen shólkemlestirilgen Ózbekstan kásiplik awqamlarına 120-jıl tolıwın keń jámáátshilikke jetkeriw maqsetinde Keńes májilisler zalında “Ózbekstan kásiplik awqamlarına 120 jıl: Jańa Ózbekstan – jańa kásiplik awqamları” atamasındaǵı ilmiy-ámeliy konferenciya bolıp ótti.

Konferenciyanı Ózbekstan kásiplik awqamları Federaciyası baslıǵınıń orınbasarı, Qaraqalpaqstan Keńesi baslıǵı Jalmenov Ulıqbek Abılaevich kiris sóz benen ashıp berdi.

“Ózbekstan kásiplik awqamlarınıń shólkemlestiriliw  tariyxı hám Jańa Ózbekstannıń jańa kásiplik awqamları” haqqında Keńes shólkemlestiriw jumısları bólimi mengeriwshisi Ilmuradova Gulnara Reypnazarovna, “Qaraqalpaqstan kásiplik awqamlarınıń shólkemlestiriliwi tariyxınan” Ózbekstan mámleketlik konservatoriyası Nókis filialı Muzıka kórkem óneri fakulteti jaslar maseleleri boyınsha dekan orınbasarı, Ilmiy izertlewshi Matjanbaev Allayar Jangabaevich, “Qońırat aymaqlıq temirjolshıları kásiplik awqam shólkemi” haqqında Qońırat aymaqlıq temirjolshıları kásiplik awqam komitet baslıǵı Embergenov Amir Umirbaevichler bayanat jasadı.

Konferenciya jumısına Qaraqalpaqstan Respublikası Joqarǵı Keńesi Komitet baslıǵı orınbasarı Bayrıeva Almagul Kurbanovna hám bir qatar ministrlik, shólkemler basshıları, kásiplik awqam belsendileri, nuraniyleri hám ǵalaba quralları wákilleri qatnastı.