Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi baslaması menen 1-oktyabr -«Muǵallimler hám ustazlar kúni» bayramı múnásibeti menen usı jıldıń 28-29-sentyabr kúnleri qaladaǵı 19-, 24- hám 27-sanlı ulıwma orta bilim beriw mekteplerinde «Úsh áwlad ushırasıwı» ilajı bolıp ótti.

Ilajǵa ulıwma orta bilim beriw mekteplerinde uzaq jıllar miynet etip, búgingi kúnde napaqada otırǵan kekse miynet veteranları, házirgi kúnde jumıs alıp barıp atırǵan orta áwlad wákilleri hám jas qánigeler mirát etildi.

Bul ushırasıwdıń tiykarǵı maqseti, kóp jıllıq miynet jolı hám turmıslıq tájiriybege iye nuranıylar ózleriniń turmıslıq sabaqların, qıyınshılıqlardı qalay jeńip ótkenligin hám miynettiń qádirin jas áwladqa jetkeriw, kekselerge húrmet, insanǵa izzet sıyaqlı xalqımızdıń ázeliy dástúrlerin hám milliy tárbiyanı jaslar qálbine sińdiriwden ibarat. Sonday-aq, búgingi kúnde húkimetimiz tárepinen bilimlendiriw tarawın rawajlandırıwǵa qaratılǵan jumıslardıń nátiyjeleri, erisilip atırǵan jetiskenlikleri hám keleshekte isleniwi kerek bolǵan jumıslardı úgit-násiyatlawdan ibarat.

Ilajda shıǵıp sóylegen miymanlar miynet maydanında arttırǵan bilim hám kónlikpeleri, óz tarawına bolǵan sadıqlıǵı arqalı jas áwlad ushın úlgi bola alatuǵının ayrıqsha atap ótti.

«Úsh áwlad ushırasıwı»nda bay turmıslıq tájiriybeler almasıldı, pikir-usınıslar tıńlandı. Jas kásiplik awqamı aǵzalarınıń ideyaları hám baslamaları oǵada áhmiyetli orın tutatuǵınlıǵı atap ótildi.

Bunday ushırasıwlar kásiplik awqamları jumısındaǵı izbe-izlik hám tájiriybe almasıwdıń ayqın kórinisi bolıp, jaslardıń qálbinde miynetke, ustazlarǵa bolǵan húrmet sezimin jáne de bekkemleydi.