Moynaq rayonında jaylasqan «Aq keme» balalar dem alıw orayında 107 balanıń qısqı dem alıs kúnlerin mazmunlı, qızıqlı hám kóterińki ruwxta shólkemlestirildi. Balalardıń dem alısı bayram keypiyatında ótti.

Aytıp ótiw orınlı, hár jılǵı dástúrge muwapıq, usı qısqı dem alıs máwsimi Qaraqalpaqstan Respublikası Húkimetiniń qollap-quwatlawı hámde Ózbekstan kásiplik awqamları Federaciyasınıń Qaraqalpaqstan Keńesi menen birgelikte shólkemlestirildi.

Jańa jıl bayram keypiyatı dem alıw orayında elege shekem saqlanıp, balalar ushın túrli qızıqlı hám ráńbáreń mádeniy-aǵartıwshılıq ilajlar shólkemlestirildi. Atap aytqanda, quwırshaq teatrı jámáátiniń tamashaları, «Qısqı zakovat» intellektuallıq oyınları, balalar arasında hár qıylı tańlawlar, dóretiwshilik shıǵıwlar jáne sport hám kewilashar shınıǵıwlar balalarǵa umıtılmas tásirler baǵıshladı.

Qısqı dem alıstıń ózine tán keypiyatı, kishkene bolsa da qarlı kórinisler, balalardıń quwanıshı hám kóterińki keypiyatı dem alıw ornında ayrıqsha bayram ortalıǵın jarattı. Qar ata hám Qar qızlar menen hár kúni bolıp turatuǵın ushırasıwları bolsa balalarǵa bir dúnya kúlki hám quwanısh baǵıshladı.

«Aq keme» balalar dem alıw orayı jámááti, ishki isler, milliy gvardiya, shıpakerler tárepinen hár bir balanıń qáwipsizligi, den-sawlıǵı hám mazmunlı dem alıwı turaqlı qadaǵalawǵa alınǵan bolıp, qısqı dem alıs balalardıń yadında jıllı hám umıtılmas máwritler sıpatında mórlenip qaldı.