2025-jıldıń 07-noyabr kúni Qaraqalpaqstan Respublikası aymaqlıq balalar medicina reabilitaciya orayında Qaraqalpaqstan Respublikası densawlıqtı saqlaw ministrligi hám Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesiniń birgeliktegi «Medicina xızmetkerleri kúni» bayramı múnásibeti menen saltanatlı keshesi bolıp ótti.

Bayram ilajında Qaraqalpaqstan Respublikası Ministrler Keńesiniń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha sekretariat baslıǵı B.Kalimbetov,   Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov, Qaraqalpaqstan Respublikası densawlıqtı saqlaw ministri M.Kurbanov, Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi baslıǵı L.Baybosınova, Ózbekstan shıpakerler Associaciyası Qaraqalpaqstan bólimi baslıǵı S.Begaliev, medicina xızmetkerleri hám taraw nuranıyları qatnastı.

Saltanatlı keshede medicina tarawındaǵı kóp jıllıq jemisli miynetleri ushın 6 xızmetker Ózbekstan Respublikası densawlıqtı saqlaw aǵlası, 2 xızmetker “Xalıq salamatlıǵı qorıqshısı” kókirek nıshanı, 30 xızmetker Qaraqalpaqstan Respublikası Ministrler Keńesiniń  Húrmet jarlıqları menen sıylıqlandı.

Bayram ilajında medicina tarawında kóp jıllıq pidayı miynetleri ushın 7 medicina tarawı xızmetkerlerine Ózbekstan densawlıqtı saqlaw xızmetkerleri kásiplik awqamı Respublikalıq Keńesiniń Húrmet jarlıǵı hám bahalı sawǵaları, sonday-aq, xızmetkerlerdiń sociallıq-ekonomikalıq huqıq hám máplerin qorǵaw, olarǵa múnásip miynet sharayatlarınıń jaratılıp beriliwin qadaǵalawdaǵı nátiyjeli miynetleri ushın  hám de mámleketimizde kásiplik awqamları háreketiniń 120 jıllıǵı hám 11 noyabr- “Kásiplik awqamları kúni” bayramı múnásibeti menen 5 kásiplik awqamı belsendisi Ózbekstan densawlıqtı saqlaw xızmetkerleri kásiplik awqamı Respublikalıq Keńesiniń Alǵısnaması hám bahalı sawǵaları menen sıylıqlandı.

Bunnan tısqarı, tarawda jemisli miynet etip atırǵan 52 medicina xızmetkerine Qaraqalpaqstan Respublikası  densawlıqtı saqlaw ministrligi hám Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesiniń birgeliktegi  Húrmet jarlıǵı hám bahalı sawǵaları  tapsırıldı.

Bayram ilajında Ózbekstan shıpakerler Associaciyası Qaraqalpaqstan bólimi tárepinende medicina tarawınıń bir qatar nuranıyları bahalı sawǵalar menen sıylıqlandı.