2025-jıl 17-oktyabr kúni Ózbekstan Respublikası Prezidenti Shavkat Mirziyoev kásiplik awqamlarınıń belsendileri hám veteranları menen ushırasıw ótkerdi. Ushırasıw dawamında mámleketimiz basshısı taraw wákilleri menen shın kewilden pikirlesti, olardıń usınıs hám baslamaların tıńladı.

Bul ushırasıw qaraqalpaqstanlılar ushın haqıyqıy quwanıshqa aylandı, sebebi Qaraqalpaqstan Respublikasınıń eń shetki awılında «Bozataw» sanatoriyası paydalanıwǵa tapsırıldı.

Onıń ashılıw máresiminde Qaraqalpaqstan Respublikası Joqarǵı Keńesiniń Baslıǵı A.Orınbaev, Ózbekstan Respublikası Prezidentiniń keńesgóyi T.Xudaybergenov, sonday-aq, Ózbekstan kásiplik awqamları Federaciyası Qaraqalpaqstan keńesiniń baslıǵı U.Jalmenov, miynet veteranları, nuraniylar,  kásiplik awqamlarınıń belsendileri, hám keń jámiyetshilik qatnastı.

– Prezidentimizdiń Qaraqalpaqstanǵa ayrıqsha itibarı sebepli bir waqıtları itibardan shette qalǵan Bozataw rayonı qısqa waqıtta qaytadan shıraylandı. Usı tiykarda onda sanatoriy qurılıp, paydalanıwǵa tapsırıldı,-deydi Bozataw rayonınıń «Erkindárya» awıl puqaralar jıyını turǵını Xudaybergen Tilewliev.

Nuraniy atanıń sózlerinde haqıyqat jámlengen. Búgingi kúnde Bozataw xalqınıń quwanıshında shek joq. Jańa sanatoriy tek ǵana dem alıw emes, al sawalandırıw, ruwxıy lázzet  baǵıshlaw ornı sıpatında da úlken áhmietke iye.

Joybarǵa bola, sanatoriy bir waqıttıń ózinde 200 dem alıwshıǵa xızmet kórsete aladı. Jılına 6000 puqara suw proceduraları, fizioterapiya hám basqa da zamanagóy medicinalıq xızmetler arqalı salamatlıǵın tiklew imkaniyatına iye boladı.

Bul jerde 6 qabatlı ıqsham jataqxana, 2 qabatlı emlew orayı, zamanagóy asxana hám mádeniyat klubı, fin hám túrk monshaları, jabıq basseyn, sonday-aq, shańaraqlıq kottedjler hám basqa da infrastrukturalar bar.

12,5 gektar maydandı ielep atırǵan sanatoriydiń 6,3 gektarı miyўeli baǵlar, 4 gektarı sayamanlı terekler menen jáne de payızlı. Alıstan kózge taslanıp turatuǵın sulıw kórinis tek ǵana gózzallıq emes, al ekologiyalıq teń salmaqlılıq, salamat ortalıq degeni. Qalaberdi, quyash panelleri arqalı qayta tikleniwshi energiya dárekleri de jolǵa qoyılǵan.

Ózbekstan kásiplik awqamları Federaciyası tárepinen 123 milliard sumǵa qarjılandırılǵan bul joybar tek ǵana sawalandırıw tarawın rawajlandırıp qoymastan, al 120 qánige ushın turaqlı jumıs orınların jaratadı. Bul bolsa, óz gezeginde, rayon xalqınıń turmıs sapasın arttırıwǵa xızmet etedi.

Qaraqalpaqstanda mine usınday sawlatlı sanatoriy qurılısı – bul jańa turmıs, jańa nápes, jańa imkaniyatlar degeni.