Dúnya júzlik densawlıqtı saqlaw shólkemi 1948-jıl 7-aprel kúni shólkemlestirilgen. Usı sáne Dúnya júzlik salamatlıq kúni sıpatında pútkil dúnyada bayram qılınadı, túrli akciya hám ilajlar ótkeriledi. Sonıń menen birge, elimizde keń xalıq qatlamın qamtıp alıwshı kishi marafon, sport jarısları shólkemlestiriledi.

Sonday-aq Ózbekstan Respublikası Prezidentiniń 2022-jıl 28-yanvardaǵı PF-60-sanlı Pármanı menen tastıyıqlanǵan 2022-2026 jıllarǵa arnalǵan Jańa Ózbekstannıń Rawajlanıw strategiyasınıń mámleketlik baǵdarlamasınıń orınlanıwın támiyinlew maqsetinde, Ózbekstan kásiplik awqamları Federaciyasiniń Qaraqalpaqstan Keńesiniń 2025-jılǵa mólsherlengen is-ilajlar baǵdarlamasına muwapıq «7-aprel – Dúnya júzlik salamatlıq kúni» múnásibeti menen júriw marafonı ótkerildi.

Júriw marafonı Nókis qalasında jaylasqan I.V.Savickiy atındaǵı Qaraqalpaq mámleketlik kórkem óner muzeyi átrapında keń maydanda shólkemlestirilip onda 2000 ǵa jaqın kárhána hám shólkemlerde islep atırǵan jaslar belsene qatnastı. Marafon sońında qatnasıwshılar azanǵı dene shınıǵıwların birgelikte ámelge asırdı.