Ózbekstan kásiplik awqamları Federaciyasınıń Qaraqalpaqstan Keńesi de “Jasıl mákan” ulıwma milliy joybarı sheńberinde sayamanlı, dekorativ hám miyweli terek nállerin egiw jumısların qızǵın alıp barmaqta.

Prezidentimizdiń baslaması menen «Jasıl mákan» ulıwma milliy joybarı sheńberinde elimiz boylap ámelge asırılıp atırǵan nál otırǵızıw ilajları shın mánisinde ulıwma milliy háreketke aylandı. Mámleketimizde keń kólemde miyweli hám sayamanlı terek nállerin otırǵızıw boyınsha áhmiyetli 40 kúnlik ótkerilip, terek egiw jumısları nátiyjeli alıp barılmaqta.

Joybar sheńberinde Ózbekstan kásiplik awqamları Federaciyasınıń Qaraqalpaqstan Keńesi baslaması menen Taqıyatas rayonı «Aydın jol» balalar dem alıw orayındaǵı 0,5 gektar jer maydanın egiwge tayın jaǵdayǵa keltirildi.

Sonday-aq, «Aydın jol» orayında “Kásiplik awqamları baǵı” jaratılıp, kásiplik awqamları xızmetkerleri tárepinen 160 tan artıq miyweli, dekorativ hám sayamanlı náller egildi.

Gúzgi terek egiw akciyası sheńberinde Ózbekstan kásiplik awqamları Federaciyasınıń Qaraqalpaqstan Keńesi xızmetkerleri, sonday-aq, tarawlıq Keńesleri baslıqları, juwaplı shólkemlestiriwshiler hámde belsendileri qatnastı.

Sonıń menen birge, barlıq aymaqlardaǵı kásiplik awqamları tárepinen de nál egiw jumısları jámleskenlik penen alıp barılıp, baǵlar, jasıl belbewler jaratılmaqta.

Shınında da, tereklerge mehir beriw, olardı tárbiyalaw eń iygilikli hám qayırlı is esaplanadı. Nál egip, baǵ jaratıw, qorshaǵan ortalıqtı taza hám azada saqlaw xalqımızdıń ásirler dawamında qáliplesip kiyatırǵan milliy qádiriyatları sanaladı.