2024-jıl 1-noyabr kúni Nókis mámleketlik pedagogika institutı májilisler zalında Ózbekstan Respublikası Oliy Majlisi Senat aǵzası, Ózbekstan kásiplik awqamı Federaciyasınıń Qaraqalpaqstan keńesi baslıǵı Jalmenov Ulıkbek Abılaevichtiń jaslar menen ushırasıwı bolıp ótti. Onda kárxána hám shólkemlerde miynet etip atırǵan jas qánigeler hám kásiplik awqamı belsendileri, sonday-aq student jaslar qatnastı.

11-noyabr —  Ózbekstan kásiplik awqamları kúni bayramı qarsańında shólkemlestirilgen bul ilájde jaslarǵa elimizde demokratik principler, Jańa Ózbekstan rawajlanıw strategiyasın ámelge asırıw barısında arttırılǵan tájiriybe hám jámáátshilik dodalawı nátiyjeleri tiykarında islep shıǵılǵan «Ózbekstan – 2030» strategiyası, sonday-aq puqaralar, ásirese, jaslardıń huqıqıy sawatxanlıǵın hám mádeniyatın asırıw, sociallıq belsendiligin asırıw barısında alıp barılıp atırılǵan jumıslar haqqında keńirek maǵlıwmatlar berildi.

Ilájda usı jónelistegi jumıslar menen birge búgingi kúnde kásiplik awqamları sistemasın jedellestiriw barısında ámelge asırılıp atırılǵan jumıslar, bul arqalı miynet kodeksi, jámáátlik shártnamalar hám kelisimlerge kiritilgen ózgerisler hámde qosımshalar haqqındada sózler boldı.

Bunda aytıp ótilgenindey, Qaraqalpaqstan kásiplik awqamları keńesi 318 218 kásiplik awqamı aǵzaların birlestirgen bolıp, sonnan 30 jastan aspaǵan jaslar sanı 107 530 aǵzalar quraydı.  (33,7%) Sonnan 39 069 aǵzalar jas miynetkeshler bolsa, 68 461 aǵza student jaslardan ibárat.

Jámáátlik shártnamalar arqalı usı jıldıń ózinde kárháńa hám shólkemlerdegi kásiplik awqamları hámde jumıs beriwshiler qarjıları esabınan:

2 jastan 3 jasqa shekem bala tarbiyasında miynet dem alısında bolǵan 360 jas analarǵa 145,2 mln. swm materiallıq járdem;

Tarawlıq kárhánalarında kem támiyinlengen, baǵıwshısın joǵaltqan 2614 shańaraqlardıń perzentleri ushın oqıw quralları, sabaqlıqlar ushın  qárejetleri qısman qaplaw ushın 299,5 mln. swm;

3340 kem támiyinlengen jas shańaraqlar wákillerine 1 mlrd 559 mln.swm materiallıq járdem;

79 joqarǵı oqıw orınlarında oqıp atırǵan qábiletli, kem támiyinlengen hám shın jetim studentlerge 327,3 mln.swm oqıw shártnama pulları qısman tólep berildi;

38 jas shańaraqlarǵa úy-jay qurılısı hám mámleketimizde islep shıǵarılgan, uzaq múddet paydalanatuǵın tovarlardı satıp alıw ushın 203,7 mln.swm payızsız ssuda ajıratıldı;

37 jas miynetkeshlerge áskeriy xızmetke shaqırılıwı múnásibeti menen 158,8 mln.swm payızsız ssudalar ajıratılıwına erisildi.

Iláj sheńberinde tálim alıw menen birge, jámáátshilik jumıslarǵa múnásip úles qosıp kiyatırǵan, hár tárepleme úlgili hámde qábiletli, sonday-aq, kem támiyinlengen shańaraqlardan bolǵan hám fizikalık imkaniyatı sheklengen studentler kásiplik awqamları stipendiyası hám sanatoriyǵa biypul jollamalar menen xoshametlendi.

Solar qatarında bir neshe jas miynetkeshlerge qásiplik awqamları keńesi “Húrmet jarlıq”ları tapsırıldı.