Nókis qalasındaǵı Respublika qan quyıw orayında “15-fevral saratan keselligine shalınǵan balalar kúni” múnásabeti menen «Men donorman» akciyası bolıp ótti.

Insannıń ómirin saqlap qalıw kóbinese qan quyıw procesi menen baylanıslı. Qan bolsa ximiya laboratoriyalarında islep shıǵarılmaydi, ol insan organizmindegi biybaxa inám. Tek jaqsı insanlardıń járdemi menen awır jaǵdaydaǵı nawqaslardı ómirge qaytarıw, olardıń ómirine ómir qosıwı múmkin. Sońǵı jıllarda bunday sawap ámeldi atqarap atırǵan insanlardıń sanı barǵan sayın kóbeyıp atırǵanı quwanıshlı.

Sonday-aq, donorlıqtıń abzallıqları boyınsha túrli akciya, úgit-násiyatlaw jumıslarınıń kóbeyip atırǵanı iygilikli islerge bas qosıp atırǵanlar sanınıń asıwına túrtki bolmaqta.

Ózbekstan kásiplik awqamları Federaciyasınıń Qaraqalpaqstan Keńesi tárepinen shólkemlestirilgen bul akciyada 18 jastan 60 jasqa shekemgi puqaralar, áskeriy xızmetkerler, student-jaslar, mámleket xızmetkerleri, kewilli jaslar hám keń jámiyetshilik wákilleri donor retinde qatnastı.

Usı ilaj respublikanıń basqa da rayonlarındaǵı medicina mákemelerinde de ótkerildi.

Qayırqomlıq ilajda gepatitke shalınbaǵan, “D” dizimde turmaytuǵın salamat puqaralardıń donor retinde qatnasıwları támiyinlendi.

Salamat insan ushın qan tapsırıw ulıwma qáwipsiz. Sebebi, insan organizminde ádetde 4,5 – 5 litr qan boladı hám odan 200 yamasa 400 ml alınadı. Organizmde bolsa azayǵan qan muǵdarın 36 saat ishinde tolıq tiklep alıw qásiyeti bar. Eń áhmietlisi, arterial gipertoniya qásteliginiń aldın alıw, elementler almasınıwın jaqsılaw hám immunitet sistemasın bekkemlewde qan tapsırıwdıń áhmiyeti úlken.

Insannıń insanǵa qan tapsırıwı sıyaqlı joqarı dárejedegi sıylıǵı bolmasa kerek. Bul arqalı kimgedir ómır baǵıshlaw – eń sawap ámellerdiń biri esaplanadı.