Ózbektan Respublikası Milliy monitoring toparı tárepinen respublikamız aymaǵında bıyılǵı jılǵı paxta jıyın-terimi máwsiminde terimshiler ushın jaratılǵan sharayatlar, balalar miyneti hám májbúriy miynetten paydalanbaw boyınsha ámelge asırılıp atırǵan jumıslar úyrenip shıǵıldı.

Ózbekstan kásiplik awqamları Federaciyası Atqarıw komitetiniń usı jıl 5-sentyabrdegi hám Ózbekstan kásiplik awqamları Federaciyası Qaraqalpaqstan Keńesi Atqarıw komitetiniń usı jıl 16-sentyabrdegi qararlarına tiykarlanıp, bıyılǵı jıldıń 26-sentyabrinen 31-oktyabrine shekem Milliy monitoring ótkerildi.

-Ilaj dawamında respublikamızdıń barlıq rayonlarında paxta atızlarında terimshiler menen sáwbetlesiwler alıp barılıp, ıqtıyarlı, uzaq jerlerden kelgen terimshilerge jaratılǵan sharayatlar, ıssı awqat, ishimlik suwı menen támiyinleniwi, terimshilerdiń miynet haqılarınıń waqtında beriliwi menen jaqınnan tanısıldı,-deydi jumısshı topar aǵzası Bekpolat Utepbergenov.-Atap aytqanda, Nókis rayonına saparımız dawamında Qırantaw awıl puqaralar jıyınındaǵı «Medet» fermer xojalıǵınıń paxta atızlarında terimshiler Ońǵarbay Kárimbetov, Rano Tadjimova, Dámexan Qálimbetovlar menen sáwbetlesiw alıp barıldı. Fermer xojalıǵı bıyılǵı jılı 18 gektar maydanǵa shigit sewip, 45 tonna paxta jetistiriwdi rejelestirmekte. Jıyın-terim jumıslarına 60 terimshi, tiykarınan  jámlespegen xalıq hám fermer xojalıǵınıń jumısshıları qatnaspaqta.

Terilgen paxtanıń hár bir kilogramı ushın 2 mıń sumnan miynet haqı hár kúni naqlay berilip atırǵanlıǵı, fermer xojalıǵı tárepinen atız basında taza ishimlik suwı hám ıssı chay shólkemlestirilgeni atap ótildi.

Sonday-aq, Qutankól awıl puqaralar jıyını aymaǵındaǵı «Jayxun», Baqanshaqlı awıl puqaralar jıyını aymaǵındaǵı «Samam Nókis» fermer xojalıqları, Darsan awıl puqaralar jıyını aymaǵındaǵı «Darsan klaster» juwapkershiligi sheklengen jámiyetiniń paxta atızlarındaǵı jıyın-terimge qatnasıp atırǵan terimshilerge jaratılǵan sharayatlar úyrenildi. Monitoring dawamında balalar miyneti hám májbúriy miynet anıqlanbadı.

Orınlarda kómekshiler menen sáwbetlesiwler barısında Prezidentimizdiń baslaması menen sociallıq miynet qatnasıqların jetilistiriw, májbúriy miynettiń aldın alıw, oǵan jol qoymaw, puqaralardıń huqıqları menen nızamlı máplerin qorǵaw baǵdarında ámelge asırılıp atırǵan keń kólemli jumıslar, sonday-aq, Ózbektan Respublikasında ratifikaciyalanǵan Xalıqaralıq Miynet shólkeminiń konvenciyalarınıń mazmun-mánisi túsindirildi.