Hayal-qızlardı hár tárepleme qollap-quwatlaw, olardı qádirlew, bekkem shańaraqlardı qáliplestiriwdegi, jas áwladtı milliy qádiriyatlarımızdı húrmet etiw ruwxında tárbiyalawdaǵı rolin hám sociallıq belsendiligin, sonday аq olardıń densawlıqların bekkemlew hám sportqa bolǵan qızıǵıwshılıqların ele de asırıw  maqsetinde hám de 8-mart – “Xalıq aralıq hayal-qızlar kúni” bayramı múnásibeti menen “Hayal-qızlardı qádirlew hápteligi” ilajları sheńberinde Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi tárepinen “Hayallar spartakiadası” sport jarısları shólkemlestirildi.

Spartakiada jarısları 2023-jıldıń 10-mart kúni Nókis qalasındaǵı Nókis Abu Ali Ibn Sino atındaǵı jámiyetlik salamatlıq texnikumınıń sport bazasında densawlıqta saqlaw tarawındaǵı joqarı hám orta arnawlı bilimlendiriw oqıw orınlarında jumıs islep atırǵan hayal-qızlar arasında sporttıń armrestling, darts, shashka, voleybol túrlerinen bolıp ótti.

Jarısqa joqarı hám orta arnawlı bilimlendiriw oqıw orınlarınan 7 komanda quramında 70 den aslam islewshi hayal-qızlar qatnastı.

Spartakiada jarısı juwmaǵında Qaraqalpaqstan medicina institutı ulıwma komandalıq esapta 1-orındı, Nókis medicina kolledji 2-orındı hám Nókis Abu Ali Ibn Sino atındaǵı jámiyetlik salamatlıq texnikumı 3-orındı iyelewge eristi.

Jarıs jeńimpazlarına Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesiniń tiyisli dárejedegi diplomları, medalları, kubokları  hám de bahalı sawǵalar, sonıń menen birge jarıs dawamında «Eń jası úlken qatnasıwshı», “Eń sheber háwesker qatnasıwshı”, “Jeńiske bolǵan intiliwi ushın” hám “Eń jası kishi qatnasıwshı” nominaciyaları boyınsha anıqlanǵan jeńimpazlarǵa da bahalı sawǵalar tapsırıldı.