Ҳаял-қызларды ҳәр тәреплеме қоллап-қуўатлаў, оларды қәдирлеў, беккем шаңарақларды қәлиплестириўдеги, жас әўладты миллий қәдириятларымызды ҳүрмет етиў руўхында тәрбиялаўдағы ролин ҳәм социаллық белсендилигин, сондай ақ олардыӊ денсаўлықларын беккемлеў ҳәм спортқа болған қызығыўшылықларын еле де асырыў  мақсетинде ҳәм де 8-март – “Халық аралық ҳаял-қызлар күни” байрамы мүнәсибети менен “Ҳаял-қызларды қәдирлеў ҳәптелиги” илажлары шеӊберинде Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси тәрепинен “Ҳаяллар спартакиадасы” спорт жарыслары шөлкемлестирилди.

Спартакиада жарыслары 2023-жылдың 10-март күни Нөкис қаласындағы Нөкис Абу Али Ибн Сино атындағы жәмийетлик саламатлық техникумының спорт базасында денсаўлықта сақлаў тараўындағы жоқары ҳәм орта арнаўлы билимлендириў оқыў орынларында жумыс ислеп атырған ҳаял-қызлар арасында спорттың армрестлинг, дартс, шашка, волейбол түрлеринен болып өтти.

Жарысқа жоқары ҳәм орта арнаўлы билимлендириў оқыў орынларынан 7 команда қурамында 70 ден аслам ислеўши ҳаял-қызлар қатнасты.

Спартакиада жарысы жуўмағында Қарақалпақстан медицина институты улыўма командалық есапта 1-орынды, Нөкис медицина колледжи 2-орынды ҳәм Нөкис Абу Али Ибн Сино атындағы жәмийетлик саламатлық техникумы 3-орынды ийелеўге еристи.

Жарыс жеӊимпазларына Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңесиниң тийисли дәрежедеги дипломлары, медальлары, кубоклары  ҳәм де баҳалы саўғалар, соныӊ менен бирге жарыс даўамында «Ең жасы үлкен қатнасыўшы», “Ең шебер ҳәўескер қатнасыўшы”, “Жеңиске болған интилиўи ушын” ҳәм “Ең жасы киши қатнасыўшы” номинациялары бойынша анықланған жеңимпазларға да баҳалы саўғалар тапсырылды.