Ózbekstan kásiplik awqamları Federaciyasınıń Qaraqalpaqstan Keńesi tárepinen 2022-jıl 16-18-noyabr kúnleri Moynaq rayonı “Aq keme” balalar dem alıw hám sawalandırıw orayında “Baslanǵısh kásiplik awqam jumısların ustav talapları tiykarında shólkemlestiriw” atamasındaǵı oqıw-seminarı shólkemlestirildi.

Oqıw-seminarda Ózbekstan bilimlendiriw hám ilim xızmetkerleri kásiplik awqamı Tórtkúl, Ellikqala hám Beruniy rayonlıq bólimsheleri quramındaǵı 46 baslaǵısh kásiplik awqamı belsendileri qatnastı.

Oqıw-seminarda Ózbekstan kásiplik awqamları Federaciyası VIII Quraltayında qabıl etilgen Ózbekstan kásiplik awqamları Federaciyası jumıs háreketiniń 2021-2025 jıllarǵa mólsherlengen strategiyalıq jónelislerinen kelip shıǵıp, Federaciyaǵa aǵza shólkemler baslanǵısh kásiplik awqam shólkemleri jumısların janlandırıwǵa hám nátiyjeligin asırıwǵa, barlıq dárejedegi kásiplik awqamları kadrların tayarlaw, qayta tayarlaw hám kvalifikaciyasın asırıw, sonday-aq, kásiplik awqamı jetekshilerin, qánigeleri hám belsendileriniń oqıtılıwın jánede jetilistiriw boyınsha komplekslik sistemanı rawajlandırıw, kásiplik awqam hám onıń keńesleriniń barlıq baǵdardaǵı jumısların kásiplik awqam aǵzalarınıń máplerin qorǵaw hámde maqsetleri ushın jumısların sapalı, nátiyjeli shólkemlestiriw, jaratıw boyınsha kompleksli is-ilajlardı ámelge asırıw, miynet qatnasıqların rawajlandırıwda kásiplik awqamları xızmetkerlerdiń miynet tarawında nızam menen qorǵalatuǵın huqıq hám erkinliklerin, máplerin támiyinlew, bazar ekonomikası dáwirinde kásiplik awqamlarıdıń tiykarǵı jumıs baǵdarları boyınsha jámiyettegi tásirin kúsheytiw eń áhmiyetli wazıypalarınan bolıp tabıladı.

Usı wazıypalardı ámelge asırıwda, kásiplik awqam jetekshisiniń wazıypası miynetkeshlerdiń mápin aldınnan kóre bilip hám jergilikli shárayatlardı esapqa alǵan halda, usı máptiń turmısqa konkret engiziliwiniń ámelge asırılıwın keńeytiwden ibarat. Kásiplik awqam aǵzası, belsendisi, kásiplik awqam apparatı xızmetkerleri, kásiplik awqam jetekshisi usınday jumıstı alıp barıw ushın málim bir bilim hám kónlikpelerge iye bolıwı zárúr. Ayırım jaǵdaylarda kásiplik awqam belsendisi sıpatında jumıs boyınsha zárúr bolǵan bilimler hám ámeliy kónlikpeler joq ekenligi sebepli mashqalalardıń orın alıwı itimallıǵı joqarı bolıp kelmekte.

Oqıw-seminar barısında Keńes baslıǵı U.Jalmenov kásiplik awqamında jumıstı alıp barıw ushın arnawlı bilim hám kommunikativ uqıplılıqqa iye bolıwı kerekligi haqqında keńirek toqtap ótti. Kásiplik awqam iskerligi, miynet nızamshılıǵı, kásiplik awqam huqıqı, miynetkeshlerdiń mápin qorǵaw boyınsha tabıslı jumıslar tájiriybeleri, jámáátlik shártnamalar tiykarında kárxanalardaǵı miynet shárayatların jaqsılawda kásiplik awqam belsendileriniń sóylesiwler alıp barıw sheberligine iye, gápke usta (orator), óz háreketlerin hám jumısın jaqsı shólkemlestiriwshi (organizator), qıyın ham konfliktli jaǵdaylardan qorıqpaytuǵın bolıwı kerekligi, kásiplik awqam aǵzalarına beriletuǵın qosımsha sociallıq kepillikler boyınsha nızamda belgilengen normalardan imkaniyattan paydalanıp, joqarı dárejede belgilep alıw hám kásiplik awqam xızmetkerleri potencialın asırıw boyınsha túsinikler berildi.

Sonıńday oqıw-seminar baǵdarlamasına tiykar Ózbekstan kásiplik awqamları Federaciyasınıń Qaraqalpaqstan Keńesi shólkemlestiriw jumısları bólimi meńgeriwshisi Gulnara Ilmuradova “Kásiplik awqamları baslanǵısh shólkemleri jumısların ustav talapları hám normativ hújjetler tiykarında shólkemlestiriw, jumıslardı jobalastırıw”, “Baslanǵısh shólkemlerde óz qararları, joqarı shólkemlerden túsip atırǵan hújjetlerdi orınlaw boyınsha monitoring alıp barıw”, Keńes miynetkeshlerdiń social-ekonomikalıq máplerin qorǵaw bólimi  meńgeriwshisi Polat Toremuratov “Miynet tarawında sociallıq sheriklik tiykarları. Jámáátlik shártnamaları hám kelisimleri”, “Xalıqaralıq Miynet Shólkeminiń Ózbekstan Respublikası tárepinen ratifikaciya qılınǵan Konvenciyaların ámelge asırıw máseleleri”, Keńestiń mádeniy-aǵartıw hám sport jumısları bólimi meńgeriwshisi  Gulmurat Tlepov “Miynet jámáátlerinde mádeniy-aǵartıw, dene-tárbiya hám sport jumısların shólkemlestiriwdiń tiykarǵı jónelisleri” atamalarında teoriyalıq hám ámeliy shınıǵıwlar ótkerdi.

Oqıw-seminar juwmaǵında qatnasıwshılar óz-ara pikir almastı hám ótkerilgen oqıw-seminar boyınsha anketa sorawlarına juwaplar berdi.