Húrmetli Prezidentimiz tárepinen 2020-jıl 23-noyabrde Ózbekstan Respublikasınıń ÓRQ-648-sanlı «Ózbekstan kásiplik awqamları kúnin belgilew haqqında»ǵı nızam qabıl etildi. Oǵan bola, 11-noyabr – «Kásiplik awqamları kúni» dep belgilendi. Bul jańalıq elimizdegi bes yarım milionnan artıq kásiplik awqamları aǵzaları tárepinen joqarı húrmet penen kútip alındı.

Mámleketimiz basshısınıń mámleketlik emes hám kommerciyallıq shólkemlerge, ásirese, Bas nızamımızda jámáátlik birlespeleri sıpatında atap ótilgen kásiplik awqamlarına bolǵan itibarı nátiyjesinde mine eki jıldan berli mámleketimizde 11-noyabr – Ózbekstan kásiplik awqamları kúni sıpatında keń belgilenip kelinbekte.

11-noyabr – “Kásiplik auqamları kúni”n belgilew sheńberinde Ózbekstan kásiplik awqamları Federaciyasınıń Qaraqalpaqstan Keńesi tárepinen “Jańa Ózbekstanda el áziz, insan áziz” degen ideya astında usı jıldıń 7-noyabr kúni Qaraqalpaqstan mámleketlik jas tamashagóyler teatrında respublika basshıları, miynet veteranları hám kásiplik awqamları belsendileri qatnasıwında konferenciya hám mádeniy-aǵartıwshılıq ilaj bolıp ótti.

Ilajda Qaraqalpaqstan Respublikası Joqarǵı Keńesi baslıǵınıń orınbasarı R.Saparbaev ilaj qatnasıwshıların Kásiplik awqamları kúni bayramı menen qutlıqladı.

Sonday-aq, ilajǵa Senator, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov, Qaraqalpaqstan Respublikası Joqarǵı Keńesi komitet baslıqları hámde ministrlikler qatnastı.

Ilaj dawamında Qaraqalpaqstan Respublikası Joqarǵı Keńesi tárepinen bir qatar belsendiler mámleketlik sıylıǵı menen sıylandı.

Sonıń menen birge, “Hayallar dápteri” sistemasınıń nátiyjeligin támiyinlew hámde hayallardıń mashqalaların sheshiwde óziniń pidáker miyneti menen bárshege wlgi kórsetip kiyatıǵanlardı múnásip hoshametlew maqsetinde Ózbekstan kásiplik awqamları Federaciyası tárepinen shólkemlestirilgen “Eń jaqsı máhálle basshısı” tańlawınıń Ózbekstan Respublikası basqıshı qatnasıwshısı Palvanova Fatima Maratovna – Shımbay rayonı, “Berdaq” máhálle puqaralar jıyını baslıǵı, “Eń jaqsı sektor basshısı” tańlawınıń Ózbekstan Respublikası basqıshı qatnasıwshısı Urumbaev Farxat Tursınbaevich – Qanlıkól rayonı Ishki isler bólimi baslıǵı, 3-sektor basshısı, “Eń úlgili is beriwshi hayal” tańlawınıń Ózbekstan Respublikası basqıshı qatnasıwshısı Dauletiyarova Parshagul Muratbaevna – Qaraqalpaqstan Respublikası nágiranlar jámiyetine qaraslı «BERNINA NUKUS» sıńar kárxanası direktorı, “Eń jaqsı hákim járdemshisi”  tańlawınıń Ózbekstan Respublikası basqıshı qatnasıwshısı Ametova Jamila Janibekovna – Qońırat rayonı, «Qaraqalpaqstan» qalasha puqaralar jıyını hákim járdemshisileriniń hár biri 30 million swm menen sonday-aq, tanlawlardıń Ózbekstan Respublikası basqıshınıń 2-orın jeńimpazı “Eń jaqsı jaslar jetekshisi” Mambetyarova Ulbosin Musatdin qızı – Ózbekstan Respublikası Jaslar agentligi Qońırat rayonlıq bóliminiń “Mıńjarǵan” máhálle puqaralar jıyınınıń jaslar jetekshisi hámde “Eń jaqsı hayal-qızlar belsendisi” tańlawınıń Ózbekstan Respublikası basqıshının 1-orın jeńimpazı Nurimbetova Nargiza Davletbaevna – Beruniy rayonı, «Qızılqala» awıl puqaralar jıyınının hayal-qızlar belsendileri hár biri Prezident sawǵası avtomobil menen sıylıqlandı.

Tanlawlardıń Ózbekstan Respublikası basqıshının birinshi hám ekinshi orındı iyelegen jeńimpazlarımız haqıyqıy avtomobildi hám avtomobil giltlerin, 11-noyabr kúni Tashkent qalasında Ózbekstan kásiplik awqamları Sarayında “Ózbekstan kásiplik awqamları kúni” múnásibeti menen bolıp ótetuǵın Bayram saltanatında tapsırıladı.

Sonday-aq, Ózbekstan kásiplik awqamları tárepinen elimizdiń social-ekonomikalıq rawajlanıwına hám xalıqtıń turmıs dárejesin asırıwǵa, miynetkeshlerdiń huqıq hám máplerin qorǵawǵa hámde olardıń salamatlıǵın tiklewge, mádeniyat hám sporttı rawajlandırıwǵa qosıp atırǵan salmaqlı úlesi hám kásiplik awqamları jumıslarındaǵı belsendiligi ushın miynet veteranları hám kásiplik awqam belsendilerine “Húrmet jarlıǵı” hámde sawǵalar, sonday-aq, Kásiplik awqamları stipendiantları hám sanatoriyaǵa biypul jollamaları berildi.

Ilaj kórkem-óner ǵayratkeri atqarıwında koncert baǵdarlaması menen dawam etti.