Тараў хызметкерлери арасында саламат турмыс қәлпин енгизиў, оларды спортқа кеңнен тартыў арқалы спорттың ғалабалығына ерисиў мақсетинде Нөкис қаласында Қарақалпақстан Республикасы денсаўлықты сақлаў министрлиги менен биргеликте Нөкис Абу Али Ибн Сино атындағы жәмийетлик саламатлық техникумы спорт базасында денсаўлықты сақлаў хызметкерлери арасында спорттың киши футбол түри бойынша 11-ноябрь “Кәсиплик аўқамлары күни” байрамы мүнәсибети менен “Өзбекстан денсаўлыкты сақлаў хызметкерлери кәсиплик аўқамының Қарақалпақстан Республикасы Кеңеси кубоги”жарысы өткерилди.

Жарысқа тараў мәкемелеринен   26  команда  қурамында 200 ден аслам хызметкерлер қатнасты.

Жарыс жуўмағында I орынды Республикалық тез медициналық жәрдем орайы Қарақалпақстан филиалы командасы, II-орынды Республикалык кәнигелестирилген руўхый саламатлык илимий әмелий медицина орайы наркология хызмети бойынша Қарақалпақстан Республикасы филиалы командасы ҳәм III-орынды Қонырат районлық медицина бирлеспеси командасы ийелеўге еристи.

Соның менен қатар жарыста «Ең жақсы дәрўазаман», «Ең жақсы ҳүжимши», «Ең жасы үлкен қатнасыўшы», «Ең жас қатнасыўшы», «Ең жақсы ойыншы», «Ең жақсы қорғаўшы» номинациялары бойынша жеңимпазлар да анықланды.

Жарыс жуўмағында жеңимпазлар, номинация жеңимпазлары, жарысқа белсене қатнасқан командалар “Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси тәрепинен таярланған тийисли дәрежедеги кубок, медальлар, дипломлар ҳәм де баҳалы саўғалар менен сыйлықланды.

Соның  менен қатар жарысты шөлкемлестириўде жақыннан жәрдем берген мәкемелерге Өзбекстан денсаўлыкты сақлаў хызметкерлери кәсиплик аўқамының Қарақалпақстан Республикасы Кеңеси тәрепинен таярланған баҳалы саўғалар тапсырылды.