Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti tárepinen baslanǵısh kásiplik awqamı komitetiniń baslıqları, belsendileri hám jumıs beriwshilerdiń wákilleri qatnasıwında «Mádeniyat, sport hám turizm tarawında sociallıq sheriklik: xızmetkerlerdiń miynet huqıqların támiyinlewde birge islesiw» atamasında oqıw-seminarı shólkemlestirildi.

Seminarǵa Ózbekstan mádeniyat, sport hám turizm xızmetkerleri kásiplik awqamı Respublikalıq Keńesiniń shólkemlestiriw isleri boyınsha bas qánigesi Aripov Jamshid, Respublikalıq Keńestiń bas yuriskonsulti Gaynazarov Orifjon qatnastı.

Seminardıń tiykarǵı maqseti – jańalanǵan Miynet kodeksi sheńberinde taraw xızmetkerleriniń sociallıq-ekonomikalıq hám huqıqıy máplerin támiyinlew, jumıs beriwshiler hám kásiplik awqamları arasındaǵı sociallıq sheriklikti jańa basqıshqa alıp shıǵıw hám miynetti qorǵawdı kúsheytiwden ibarat.

Seminarda atap ótilgenindey, mádeniyat, sport hám turizm mákemeleri xızmetkerleriniń miynet sharayatları ózine tán ózgesheliklerge iye. Ásirese, jumıs waqtınan tısqarı hám dem alıs kúnlerindegi miynetke durıs haqı tólew, ishki miynet tártibin nızamlı tiykarda shólkemlestiriw hám jumıs orınlarında qáwipsizlik qaǵıydalarına ámel etiliwi búgingi kúnniń eń áhmiyetli máseleleri bolıp esaplanadı.

Ilaj dawamında qatnasıwshılar jumıs beriwshiler hám kásiplik awqamları baslıqlarınıń sistemalı sóylesiwi miynet kelispewshilikleriniń aldın alıw hám mákemelerde salamat ruwxıy-aǵartıwshılıq ortalıqtı qáliplestiriwdiń tiykarǵı faktorı ekeni atap ótildi.

«Kásiplik awqamları hám jumıs beriwshiler bir-birine qarsılas emes, al ulıwma maqset jolında háreket etetuǵın sherikler bolıp esaplanadı. Xızmetker ushın qáwipsiz, qolaylı hám múnásip miynet haqı tólenetuǵın jumıs ornı jaratılǵan jaǵdayda ǵana jumıs nátiyjeliligi hám jetiskenlikleri joqarı boladı. Biziń tiykarǵı wazıypamız – mine usı teń salmaqlılıqtı nızam ústinligi tiykarında uslap turıw bolıp esaplanadı,» – dep atap ótti kásiplik awqamı Respublikalıq Keńesiniń bas qánigesi J.Aripov.

Seminarda huqıqıy hám ámeliy máseleler boyınsha qızǵın pikir-talaslar ótkerildi. Atap aytqanda, jańa xızmetkerlerdi sınaq múddeti dáwirinde xoshametlew, intizamıy jazalardı múddetinen aldın alıp taslaw tártibi hám Materiallıq xoshametlew qorı (MXQ) qarjıların ádil bólistiriw boyınsha qánigeler tárepinen anıq huqıqıy túsinikler berildi.