12-iyun-«Pútkil dúnya júzilik balalar miynetine qarsı gúresiw kúni» múnásibeti menen Ózbekstan kásiplik awqamları Federaciyasınıń Qaraqalpaqstan Keńesi tárepinen Ellikqala rayonındaǵı «Aral balaları» dem alıw orayında «Balalar miynetine qızıl kartochka: Balalar ushın ádalatlı oyın, úlkenler ushın múnásip miynet!» súreni astında ilaj ótkerilip, onda dem alıwshı balalar menen Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov, Ellikqala rayonı, “Aral balaları” dem alıw orayı baslıǵı R.Allambergenov, Keńestiń miynetkeshlerdiń sociallıq-ekonomikalıq máplerin qorǵaw bólimi meńgeriwshisi P.Toremuratov hám sonday-aq sporttıń qol urısı túri boyınsha chempionları T.Ataxanov, G.Xalmuratova hám basqalar qatnastı.

Ilajda Keńes baslıǵı tárepinen 12-iyun-«Pútkil dúnya júzilik balalar miynetine qarsı gúresiw kúni» haqqında tolıq maǵlıwmat berip ótti. Májbúriy miynet sonıń ishinde, balalar miynetin toqtatıw ushın alıp barılǵan jumıslar tiykarında bir qatar unamlı nátiyjelerge erisilgenligi, sonday-aq, balalar miyneti toqtatılǵanlıǵın ayrıqsha atap ótti.

Sonday-aq, T.Ataxanov hám G.Xalmuratovalar ózleriniń bul jetiskenliklerine erisiwde mámleketimizde barlıq sharayatlardıń jaratılǵanlıǵı, onda jaslarımız durıs paydalana alıwı, birinshi gezekte jaqsı oqıwı, turaqlı túrde sport penen shuǵıllanıwı, bos waqıtların durıs shólkemlestiriwi kerek ekenligin aytıp ótti.

12-iyun – «Pútkil dúnya júzilik balalar miynetine qarsı gúresiw kúni»ne baǵıshlanıp balalar arasında súwret salıw tańlawları, sporttıń shashka, stol tennisi túrlerinen jarıslar ótkerilip jeńimpazlarǵa Ózbekstan kásiplik awqamları Federaciyasınıń Qaraqalpaqstan Keńesi tárepinen Xalıqaralıq miynet shólkemi hám Ózbekstan kásiplik awqamları Federaciyasınıń logotipleri túsirilgen futbolka, kepka hám diplom, qımbat bahalı sawǵalar menen sıylıqlandı.

«Balalar miynetine qızıl kartochka: Balalar ushın ádalatlı oyın, úlkenler ushın múnásip miynet!» súreni astında ilajlar hám Tórtkúl rayonındaǵı «Oq kabutar», Taqıyatas rayonındaǵı “Aydın jol”, Nókis qalasındaǵı “Aral” balalar dem alıw oraylarında ótkerildi.