Ózbekstan Respublikası Prezidentiniń 2022-jıl 15-marttaǵı PQ-167-sanlı hám 2023-jıl 11-marttaǵı PQ-92-sanlı qararları orınlanıwın támiyinlew, Birlesken Milletler shólkeminiń Bas assambleyası tárepinen “1-oktyabr – Xalıqaralıq kekseler kúni” dep járiyalanǵanlıǵı múnásibeti menen hámde Ministrler Kabinetiniń 2019-jıl 27-sentyabrdegi 816-sanlı qararına muwapıq hár jılı oktyabr ayınıń birinshi háptesi “Kekseler hápteligi” sıpatında keń túrde nıshınlanıwı belgilengen.

Bul háptelikte belsene qatnasıw hámde Ózbekstan kásiplik awqamları Federaciya Keńesi Prezidiumınıń 2019-jıl 4-oktyabrdegi «Kekse áwlad wákilleriniń jámiyettegi ornı hám sociallıq iskerligin asırıwda kásip awqamlarınıń qatnası haqqında»ǵı 16-14 «s»-sanlı qararı tiykarında kásiplik awqamları tárepinen usı jıldıń 2-8-oktyabr kúnleri «Kekselerge húrmet-jaslarǵa órnek»degen ideya astında «Kekseler hápteligi» nde qatnasın támiyinlew is-rejeleri islep shıǵılǵan.

Joqarıdaǵılardan kelip shıǵıp usı jıldıń 8-dekabr kúni Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi baslaması menen qalamızdaǵı 8-sanlı ulıwma orta bilim beriw mektebinde bilimlendiriw tarawında uzaq jıllar jemisli miynet etip, búgingi kúnde húrmetli dem alısta otırǵan miynet nuranıyları qatnasında «Kásibim-maqtanıshım» atamasında iláj shólkemlestirildi.

Ótkerilgen ilájǵa, miynet nuranıyları Ózbekstan Respublikasına Miynet sińgen jaslar ustazı, Qaraqalpaqstan Respublikasına miyneti sińgen xalıq bilimlendiriw xızmetkeri mámleketlik ataqlarınıń iyesi -B.Sultanov, Karaqalpaqstan Respublikasına miyneti sińgen jaslar ustazı mámleketlik ataǵı iyesi, Xalıq bilimlendiriw pidayısı, Ózbekstan hám Qaraqalpaqstan xalıq bilimlendiriw aǵlası kókirek nıshanlarıı iyesi- A.Erimbetov, Ózbekstan hám Qaraqalpaqstan xalıq bilimlendiriw aǵlası kókirek nıshanı iyesi- A.Narimbetov, Ózbekstan hám Qaraqalpaqstan xalıq bilimlendiriw aǵlası kókirek nıshanı iyesi -X.Jaksimova, Ózbekstan hám Qaraqalpaqstan xalıq bilimlendiriw aǵlası kókirek nıshanı iyesi,  Qaraqalpaqstanǵa miyneti sińgen muǵallim, III-dárejeli «Miynet nuranıyı» kókirek belgisi iyesi -Q.Qalbaevalar mirát etildi.

Iláj barısında miynet nuranıyları ózleriniń basıp ótken miynet jolları, qıyınshılıqları hám jemisleri haqqında aytıp ótip, búgingi kúnimizde húkimetimiz tárepinen bilimlendiriw tarawın rawajlandırıw boyınsha alıp barıp atırǵan reformalar, muǵallimlerge jaratılǵan imkániyatlar, olardan paydalanıp úlken jetiskenliklerge erisip atırǵan muǵallimler, keleshegimiz bolǵan jas áwlad tárbiyasındaǵı  muǵallimlerimizdiń aldına qoyılǵan búgingi kúnniń wazıypalarına keńnen toqtalıp ótti.

Óz náwbetinde mektep muǵallimleri tárepinen miymanlarǵa ózlerin qızıqtırǵan sorawların berip, ózlerine ómir sabaqların alıwǵa miyassar boldı. Iláj barısında mekteptiń háweskerler dógeregi qatnasıwshıları tárepinen tayarlanǵan saz-sáwbet inám etildi.

Iláj sońında Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi keńesi tárepinen mektep kitapxanasına kitaplar toplamı, sonday-aq miymanlarǵa estelik sawǵaları tapsırıldı.

Ótkerilgen iláj qatnasıwshılardıń ómirinde este qalarlıqtay bay mazmunǵa iye tásirler qaldırıp, qızıqlı hám mazmunlı bolıp ótti.