Nawrız bayramı – insanıylıq, miyrim-shápáát, miriwbet hám miynetkesh sıyaqlı qádiriyatlardı ózinde jámlegen áyyemgi ulıwma xalıqlıq bayramlardan biri bolıp esaplanadı.

Usı jıldıń 21-mart kúni Nókis qalası «Jaslar orayı» hám «Doslıq» kanalı boyında «Nawrızdı ulıǵlaw – insandı ulıǵlaw!» degen bas ideyası astında Nawrız ulıwma xalıqlıq bayramına baǵıshlanǵan saltanat hám xalıq seyili shólkemlestirilip, onda Ózbekstan kásiplik awqamları Federaciyasınıń Qaraqalpaqstan Keńesi, tarawlıq kásiplik awqamları keńesleri, birlesken komitet xızmetkerleri hám kásiplik awqamlarınıń belsendileri qatnastı.

Bayramda Ózbekstan kásiplik awqamları Federaciyasınıń Qaraqalpaqstan Keńesi tárepinen milliyligimizdiń tımsalı bolǵan otaw ornatılıp, bayramǵa say bezelip, átirapında jası úlken hám jaslar menen tolı bolıwı bayram keypiyatın payda etti. Keń dasturxanda báhár ónimleri, milliy taǵamlar, hár qıylı buyımlardıń kórgizbesi jıynalǵanlarǵa usınıldı.

Nawrız – bul ázeliy ruwxıy qádiriyatlardı, xalıq dástúrlerin hám insanıy pazıyletlerdi ózinde jámlegen bayram bolıp esaplanadı. Ol tek ǵana Ózbekstanda emes, al pútkil Oraylıq hám Qubla Aziyada, Kavkaz hám basqa da mámleketlerde keńnen belgilenedi. Nawrız bayramı áhmiyetin joǵaltpay, keleshek áwladqa da ilimiy tiykarlarǵa hám mádeniy miyrasqa bay bayram sıpatında jetkeriw – xalıqtıń juwapkershiligi bolıp esaplanadı.