1997-jıldan baslap Xalıqaralıq Miynet Shólkemi tárepinen 12-iyun kúni “Pútkil dúnya júzilik balalar miynetine qarsı gúresiw kúni” dep járiyalanǵan.

Usı sáne múnásibeti menen Ózbekstan kásiplik awqamları Federaciyasınıń Qaraqalpaqstan Keńesi tárepinen Nókis qalasında jaylasqan «Turan” hám dem alıw orayında “Rawajlanıw anıq, biraq islenetuǵın jumıslarımız kóp: keliń, is-háreketlerimizdi tezlestireyik!” súreni astında ilaj ótkerilip, bunda dem alıwshı balalar menen Keńestiń Miynetkeshlerdiń sociallıq-ekonomikalıq máplerin qorǵaw bólimi meńgeriwshisi P.Toremuratov, jetekshi qánigesi E.Utepbergenov, Ózbekstan kásiplik awqamları Federaciyasınıń Dene tárbiya hám sport basqarması Qaraqalpaqstan Respublikası boyınsha juwaplı shólkemlestiriwshisi S.Sharipov, Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesi baslıǵı M.Daulbaev, Ózbekstan hám Qaraqalpaqstan Respublikasınıń sporttıń belbewli gures túri boyınsha chempionları A.Joldasbaeva, K.Sherimbetova hám basqalar qatnastı.

Ilajda Keńestiń miynetkeshlerdiń sociallıq-ekonomikalıq máplerin qorǵaw bólimi qánigeleri tárepinen 12 – iyun – «Pútkil dúnya júzilik balalar miynetine qarsı gúresiw kúni» haqqında keń túrde aytıp ótip, májbúriy miynet sonıń ishinde balalar miynetine jol qoymawda alıp barılǵan jumıslar tiykarında bir qatar unamlı nátiyjeliklerge erisilgenligin, sonıń ishinde balalar miyneti toqtatılǵanlıǵın ayrıqsha atap ótti.

Bunnan soń, A.Joldasbaev, K.Sherimbetovalar ózleriniń usı tabıslarına erisiwinde mámleketimizde bárshe sharayatlardıń jaratılǵanlıǵın, bunnan jaslarımız durıs paydalana biliwi, birinshi gezekte jaqsı oqıwı, udayı túrde sport penen shuǵıllanıwı, bos waqıtların durıs shólkemlestiriwi kerekligin hám bul baǵdardaǵı jumıslarda ata-analar keń jámiyetshilik penen birgelikte jumıs alıp barıw zárúrligin aytıp ótti.

12-iyun – “Pútkil dúnya júzilik balalar miynetine qarsı gúresiw kúni”ne baǵıshlanıp balalar arasında súwret salıw tańlawları, sporttıń shashka, stol tennisi túrlerinen jarıslar ótkerilip jeńimpazlarǵa Ózbekstan kásiplik awqamları Federaciyasınıń Qaraqalpaqstan Keńesi tárepinen balalarǵa Xalıq aralıq miynet shólkemi hám Ózbekstan kásiplik awqamları Federaciyasınıń logatipleri tusirilgen futbolka, kepka hám diplom, qimbat bahalı sawǵalar menen sıylıqlandı.

“Rawajlanıw anıq, biraq islenetuǵın jumıslarımız kóp: keliń, is-háreketlerimizdi tezlestireyik!” súreni astında ilajlar hám Ellikqala rayonındaǵı “Aral balaları”, Tórtkúl rayonındaǵı «Oq kabutar», Taqıyatas rayonındaǵı “Aydın jol”, Moynaq rayonındaǵı “Aq keme”, Nókis qalasındaǵı “Aral” balalar dem alıw oraylarında ótkerildi.