2025-jıl 7-may kúni Nókis qalası 1-sanlı sport mektebinde “Bes baslama olimpiadası” sheńberinde bilim beriw mákemeleri oqıtıwshıları arasında “Salamat denede – sapalı bilim” súreni astında Ózbekstan kásiplik awqamları Federaciyası kubogi sport jarıslarınıń Qaraqalpaqstan Respublikası basqıshı ótkerildi.

Ózbekstan Respublikası Prezidentiniń 2022-jıl 28-yanvardaǵı PF-60-sanlı Pármanı menen tastıyıqlanǵan «2022-2026-jıllarǵa mólsherlengen Jańa Ózbekstannıń rawajlanıw strategiyası» 67-maqsetinde belgilengen wazıypalardı ámelge asırıw, dene tárbiya hám sport penen turaqlı shuǵıllanatuǵın puqaralardıń sanın asırıw, bilim beriw shólkemleri xızmetkerlerin sport ilajlarına keń qamtıw, olar arasında jarıslar shólkemlestiriw, sport infrastrukturasın jaqsılaw hám zárúr sport inventarları menen támiyinlew, xızmetkerlerdiń fizikalıq belsendilik dárejesin asırıw, bilim beriw shólkemlerindegi sport sekciyaları hám dógereklar jumısların rawajlandırıwǵa kómeklesiw, oqıtıwshılardıń bos waqıtlarında sport penen shuǵıllanıwları ushın qolaylı sharayatlar jaratıw maqsetinde Ózbekstan kásiplik awqamları Federaciyasınıń Qaraqalpaqstan Keńesi, Qaraqalpaqstan Respublikası mektepke shekemgi hám mektep bilimlendiriw ministrligi, Qaraqalpaqstan Respublikası Sport ministrligi hámde Ózbekstan jaslar isler agentligi Qaraqalpaqstan Respublikası basqarmas tárepinen tastıyıqlanǵan qospa qararǵa tiykar “Salamat denede – sapalı bilim” súreni astında Ózbekstan kásiplik awqamları Federaciyası kubogi sport jarıslarınıń Qaraqalpaqstan Respublikası basqıshı Nókis qalası 1- hám 2-sanlı sport mektepleri, Ájiniyaz atındaǵı Nókis mámleketlik pedagogikalıq institutı, Berdaq atındaǵı Qaraqalpaq mámleketlik universiteti hámde Jaslar orayında bolıp ótti.

Ilajda Ózbekstan kásiplik awqamları Federaciyasınıń Qaraqalpaqstan Keńesi, Qaraqalpaqstan Respublikası mektepke shekemgi hám mektep bilimlendiriw ministrligi, Qaraqalpaqstan Respublikası Sport ministrligi, Ózbekstan jaslar isler agentligi Qaraqalpaqstan Respublikası basqarmaları wákilleri hámde tarawlıq kásiplik awqamları Qaraqalpaqstan Respublikası Keńesi baslıqları, juwaplı shólkemlestiriwshileri hámde tiyisli ministrlikler wákilleri qatnastı. Jarısta ótken basqıshlarda jeńimpaz bolǵan 17 komandalarda 493 oqıtıwshı ustazlarımız sporttıń ǵalabalıq túrleri mini-futbol, shaxmat, shashka, stol tennisi hámde voleybol túrleri boyınsha óz-ara kúsh sınastı. Bul jarıslardıń ótken basqıshlarında 17 mıń 18 den artıq bilim beriw mákemeleriniń xızmetkerleri qatnastı.

Kún dawamında sport jarısları qızǵın ótip hám tájiriybeli tóreshiler tárepinen hár bir sport túrinen jeńimpazlar hám ulıwma komandalıq esapta utıp shıqqan jeńimpazlardı anıqladı.

“Salamat denede – sapalı bilim” súreni astında “Ózbekstan kásiplik awqamları Federaciyası kubogi” sport jarıslarınıń Qaraqalpaqstan Respublikası basqıshında komandalıq esapta 3-orındı Ámiwdárya rayonlıq komandası, 2-orındı Taqıyatas rayonlıq komandası, 1-orındı Nókis qalalıq komandası jeńimpaz dep tabıldı.

Ulıwma komandalıq esapta birinshi orındı iyelep jeńimpaz bolǵan Nókis qalalıq komandasına “Ózbekstan kásiplik awqamları Federaciyası kubogi” hámde 30 million sum pul sıylıǵı tapsırıldı.

Sonday-aq, jeńimpaz bolǵan komandalarǵa hámde túrli nominaciya iyelerine Ózbekstan kásiplik awqamları Federaciyasınıń Qaraqalpaqstan Keńesi tárepinen diplom hám sawǵalar sawǵaları tapsırıldı.