Mámleketimiz basshısınıń mámleketlik emes hám kommerciyallıq shólkemlerge, ásirese, Bas nızamımızda jámáátlik birlespeleri sıpatında atap ótilgen kásiplik awqamlarına bolǵan itibarı nátiyjesinde mámleketimizde 11-noyabr – Ózbekstan kásiplik awqamları kúni sıpatında keń belgilenip kelinbekte.

11-noyabr – “Kásiplik auqamları kúni”n belgilew sheńberinde Ózbekstan kásiplik awqamları Federaciyasınıń Qaraqalpaqstan Keńesi tárepinen “Jańa turmıs ushın, Jańa Ózbekstan ushın!” degen ideya astında usı jıldıń 9-noyabr kúni Qaraqalpaqstan mámleketlik jas tamashagóyler teatrında respublika basshıları, miynet veteranları hám kásiplik awqamları belsendileri qatnasıwında mádeniy-aǵartıwshılıq ilaj bolıp ótti.

Ilajda Qaraqalpaqstan Respublikası Joqarǵı Keńesi baslıǵı A.Orınbaev ilaj qatnasıwshıların Kásiplik auqamları kúni bayramı menen qutlıqladı.

Sonday-aq, ilajǵa Senator, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov, Qaraqalpaqstan Respublikası Joqarǵı Keńesi komitet baslıqları hámde ministrlikler qatnastı.

Ilajda Ózbekstan kásiplik awqamları Federaciyasınıń Qaraqalpaqstan Keńesi tárepinen 2023-jıldıń is jobasına muwapıq sonday-aq, «Insanǵa itibar hám sapalı bilimlendiriw jılı» is-ilajlarına muwapıq kásiplik awqamlarınıń Ustav talaplarınan kelip shıǵıp bir qatar jumısları haqqında aytıp ótildi.

Ilaj dawamında Qaraqalpaqstan Respublikası Joqarǵı Keńesi tárepinen bir qatar belsendiler mámleketlik sıylıǵı menen sıylandı.

Sonıń menen birge, “Hayallar dápteri” sistemasınıń nátiyjeligin támiyinlew hámde hayallardıń mashqalaların sheshiwde óziniń pidáker miyneti menen bárshege wlgi kórsetip kiyatıǵanlardı múnásip hoshametlew maqsetinde Ózbekstan kásiplik awqamları Federaciyası tárepinen shólkemlestirilgen “Eń jaqsı máhálle basshısı” tańlawınıń Ózbekstan Respublikası basqıshı qatnasıwshısı Begjanov Baxadir Qosımbetovich – Kegeyli rayonı, “Madeniyat” máhálle puqaralar jıyını baslıǵı, “Eń jaqsı sektor basshısı” tańlawınıń Ózbekstan Respublikası basqıshı qatnasıwshısı Masharipov Baxrom Ibragimovich – Taqıyatas rayonı prokurorı, 2-sektor basshısı, “Eń jaqsı jaslar jetekshisi” tańlawınıń Ózbekstan Respublikası basqıshı qatnasıwshısı Otamuratov Jasurbek Qurbanboy ulı – Ámiwdárya rayonı, «Qilichboy» awıl puqaralar jıyını jaslar jetekshisi, “Eń jaqsı hayal-qızlar belsendisi” tańlawınıń Ózbekstan Respublikası basqıshı qatnasıwshısı Ibraimova Guljaxan Temirxanovana – Ámiwdárya rayonı, «Nazarxon» awıl puqaralar jıyını hayal-qızlar belsendisi, “Eń jaqsı profilaktika inspektorı” tańlawınıń Ózbekstan Respublikası basqıshı qatnasıwshısı Nurekeev Xamid Polatovich – Ámiwdárya rayonı, «Bobur» máhálle puqaralar jıyını profilaktika inspektorı “Eń jaqsı hákim járdemshisi”  tańlawınıń Ózbekstan Respublikası basqıshı qatnasıwshısı Abdiramanova Shaxzada Nietbaevna – Nókis qalası, «Shımbay shayxana» máhálle puqaralar jıyını hákim járdemshisileriniń hár biri 30 million swm menen sıylıqlandı.

“11-noyabr – Ózbekstan kásiplik awqamları kúni» bayramı múnásibeti menen watanımızdıń rawajlanıwı hám onıń qúdiretin asırıw jolındaǵı islerde belsendi qatnasıp kiyatırǵan, miynetkeshlerdiń sociallıq-ekonomikalıq xuqıq hám máplerin qorǵaw, kásiplik awqamlarınıń abıroyın asırıwǵa múnásip úles qosıp atırǵan bir qatar jerleslerimiz Ózbekstan mámleketlik mákemeleri hám jámáát xızmeti xızmetkerleri kásiplik awqamı Qaraqalpaqstan Keńesi baslıǵı – Madreymov Raxman Polatovich hámde Nókis qalası 6-sanlı ulıwma bilim beriw mektebiniń rus tili hám ádebiyatı, tárbiya pánleri oqıtıwshısı, kásiplik awqam komiteti baslıǵı – Allamuratova Nurjamal Berdibekovnalar Ózbekstan kásiplik awqamları Federaciyasınıń “Ehtirom nishoni” kókirek belgisi menen sıylıqlandı.

Sonıń menen birge, Ózbekstan kásiplik awqamları tárepinen elimizdiń social-ekonomikalıq rawajlanıwına hám xalıqtıń turmıs dárejesin asırıwǵa, miynetkeshlerdiń huqıq hám máplerin qorǵawǵa hámde olardıń salamatlıǵın tiklewge, mádeniyat hám sporttı rawajlandırıwǵa qosıp atırǵan salmaqlı úlesi hám kásiplik awqamları jumıslarındaǵı belsendiligi ushın miynet veteranları hám kásiplik awqam belsendilerine Húrmet jarlıǵı hámde sawǵalar menen sıylıqlandı.

Ilaj kórkem-óner ǵayratkeri atqarıwında koncert baǵdarlaması menen dawam etti.