Usı jıl 5-oktyabr kúni Nókis qalasındaǵı Qaraqalpaq mámleketlik jas tamashagóyler teatrında respublikamızda Hayal-qızlardıń mashqalaların sistemalı túrde sheshiw, olardı sociallıq jaqtan qollap-quwatlaw boyınsha respublikalıq komissiyası tárepinen ótkerilip kiyatırǵan «Eń jaqsı sektor baslıǵı», «Eń jaqsı máhálle baslıǵı», Eń jaqsı hákim járdemshisi», «Eń jaqsı jaslar jetekshisi», «Eń jaqsı hayal-qızlar belsendisi» hám «Eń úlgili jumıs beriwshi hayal» tańlawlarınıń Qaraqalpaqstan Respublikalıq basqıshı jeńimpazların sıylıqlaw máresimi bolıp ótti.

Ilajda Qaraqalpaqstan Respublikası Joqarı Keńesi baslıǵı A.Orınbaev, Qaraqalpaqstan Respublikası Ministrler Keńesi baslıǵı Q.Sariev, Ózbekstan temir jol hám transport qurıwshıları kásiplik awqamı Respublika Keńesiniń baslıǵı Q.Sabirov hám Qaraqalpaqstan Respublikası Ministrler Keńesi baslıǵınıń orınbasarı, shańaraq hám hayal-qızlar komiteti baslıǵı M.Axmedova qatnastı.

Ilajdı Ózbekstan kásiplik awqamları Federaciyasınıń Qaraqalpaqstan Keńesiniń baslıǵı U.Jalmenov basqarıp bardı.

Bunnan keyin Qaraqalpaqstan Respublikası Joqarǵı Keńesiniń Baslıǵı A.Orınbaev hám Ózbekstan temir jol hám transport qurıwshıları kásiplik awqamı Respublika Keńesiniń baslıǵı Q.Sabirov shıǵıp sóylep, jıynalǵanlardı Prezidentimizdiń basshılıǵında elimizde hayal-qızlardı sociallıq qorǵaw, olardıń mashqalaların saplastırıw boyınsha alıp barılıp atırǵan keń kólemli jumıslarǵa toqtap ótti.

Ilajda atap ótilgenindey, Hayallar mashqalaların sistemalı túrde sheshiw, olardı sociallıq qollap-quwatlaw boyınsha respublikalıq komissiyası, onıń quramındaǵı jumısshı topar hám juwaplı kárxana, mákeme, shólkemler tárepinen elimizdiń aymaqlarında «Hayallar dápteri»ne kirgizilgen hayal-qızlardıń mashqalaların sheshiw, olardıń bántligin támiyinlew baǵdarında bir qatar jumıslardı alıp barmaqta. Atap aytqanda, jumıssız, sociallıq qorǵawǵa mútáj hayal-qızlardı kásip-ónerge hám isbilermenlikke oqıtıw, úy qaptalı qıytaq jerlerinen ónimli paydalanıwǵa kómeklesiw, ózin-ózi bánt etiw, kreditler ajıratıw, mayıplıǵı bolǵan hayal-qızlarǵa materiallıq járdem kórsetiw, olardı turaq jay menen támiyinlew, turaq jayların ońlap beriw hám basqa da keń kólemli jumıslar alıp barıldı. Sonday-aq, qaramaǵında bir hám onnan kóp birinshi topar mayıp balaları bolǵan jalǵız analar, medicinalıq, huqıqıy hám psixologiyalıq járdemge mútáj hayal-qızlar ámeliy qollap-quwatlanbaqta.

Hayal-qızlardıń mashqalaların sheshiw, olardı sociallıq qollap-quwatlawda mámleketlik uyımlardıń juwapkershiligi arttırılmaqta. Ózbekstan kásiplik awqamları Federaciyası tárepinen bul iygilikli islerdi ámelge asırıwda úlgili hám turaqlı jumıs alıp barǵan juwaplı xızmetkerlerdi xoshametlep barıw jolǵa qoyıldı.

Xalıqtıń sociallıq járdemge mútáj qatlamların qollap-quwatlap jáne usınday shańaraqlarǵa materiallıq hám biyǵárez járdem kórsetip, sonday-aq, elimizde gender siyasatı hám jámiyetlik-siyasiy turmısta hayal-qızlardıń rolin arttırıwǵa qaratılǵan jumıslardı úlgili shólkemlestirgen kárxanalardıń hayal-qız basshıların xoshametlew hám jumıs beriwshilerdiń jumıs nátiyjeliligin arttırıw maqsetinde «Eń úlgili jumıs beriwshi hayal», aymaqları abat hám tınısh bolǵan puqaralar jıyınlarınıń baslıqları arasında «Eń jaqsı máhálle baslıǵı», mashqalalardı «Máhálle kesiminde», «Shańaraq kesiminde» úyreniw, olardı sheshiwge kómeklesiw, puqaralardıń ózin-ózi basqarıw uyımları hám wákillikli mákeme jáne shólkemler arasında sheriklikti bekkemlew, aymaqlardı kompleksli rawajlandırıwdı qollap-quwatlaw maqsetinde «Eń jaqsı sektor basshısı»,  hár bir qala, rayonlardaǵı hár bir máhállede isbilermenlikti rawajlandırıw, xalıqtıń bántligin támiyinlew hám kambaǵallıqtı qısqarttırıw  maqsetinde «Eń jaqsı hákim járdemshisi», jaslar mashqalaların máhállelerde sheshiw, olardı watandı súyiwshilik ruwxında tárbiyalaw, jaslardıń bos waqıtların mazmunlı shólkemlestiriw hámde jaslar arasında jınayatshılıqtı kemeyttiriw maqsetinde «Eń jaqsı jaslar jetekshisi», máhállelerde hayal-qızlar hám kekse áwlad wákilleri menen islesiw sistemasın jańa basqıshqa alıp shıǵıw, máhálle kesiminde islewge juwapker bolgan shaxslar iskerligin nátiyjeli shólkemlestiriw hám óz-ara sherikshilikti támiyinlew maqsetinde «Eń jaqsı hayal-qızlar belsendisi» tańlawları jolǵa qoyıldı.

Dáslep, tańlawlardıń qala hám rayon basqıshları usı jıldıń iyul-avgust aylarında ótkerilip, «Eń úlgili jumıs beriwshi hayal» tańlawı boyınsha 112, «Eń jaqsı máhálle baslıǵı» tańlawı boyınsha 256, «Eń jaqsı hákim járdemshisi» tańlawı boyınsha 290, «Eń jaqsı jaslar jetekshisi» tańlawı boyınsha 293, «Eń jaqsı hayal-qızlar belsendisi» tańlawı boyınsha 268 hám “Eń jaqsı sektor basshısı” tańlawı boyınsha 48 talabanlar qatnastı.

Sonnan keyin, sentyabr ayında tańlawlardıń ekinshi – Qaraqalpaqstan aymaqlıq basqıshı ótkerildi.

Ilajda jeńimpazlarǵa sıylıqlar saltanatlı túrde tapsırıldı.

«Eń úlgili jumıs beriwshi hayal» tańlawında úshinshi orındı Qońırat rayonı «WUNDERKIND IN KUNGRAD» mámleketlik emes mektepke shekemgi bilimlendiriw mákemesi baslıǵı Abdullaeva Dilnoz Kengesbaevna, ekinshi orındı Kegeyli rayonı «RUS-ISLAM-SULTAN» shańaraklıq kárxanası baslıǵı Rametova Ayjamal Tolıbaevna, birinshi orındı Qaraqalpaqstan Respublikası mayıplar jámiyetine qaraslı «BERNINA NUKUS» shuba kárxanası direktorı Dauletiyarova Parshagul Muratbaevna, «Eń jaqsı máhálle baslıǵı» tańlawında úshinshi orındı Kegeyli rayonı «Gújimterek» máhelle puqaralar jıyını baslıǵı Jumamuratov Baxtiyar Jadigerovich, ekinshi orındı Nókis qalası «Nawqan baǵ» máhelle puqaralar jıyını baslıǵı Aytbaeva Zamira Joldashovna, birinshi orındı Shımbay rayonı  «Berdaq» máhelle puqaralar jıyını baslıǵı Palvanova Fatima Maratovna, «Eń jaqsı sektor basshısı» tańlawında úshinshi orındı Xojeli rayonı mámleketlik salıq inspekciyasi baslıǵı wazıypasın orınlawshısı, 4-sektor basshısı Niyatullaev Pedebay Jumabaevich, ekinshi orındı Qoraózek rayonı prokurorı, 2-sektor basshısı Djolmanov Najimaddin Baymurzaevich, birinshi orındı Qanlıqól rayonı ishki isler bólimi baslıǵı, 3-sektor basshısı Urumbaev Farxat Tursınbaevich iyeledi.  Sonday-aq, «Eń jaqsı hákim járdemshisi» tańlawında Tórtkúl rayonı «Makazobod» máhálle puqaralar jıyını hákim járdemshisi Kuchkarov Akmaljan Ikramovich úshinshi, Shomanay rayonı «Mádeniyat» máhálle puqaralar jıyını hákim járdemshisi Qıdırbaev Baxtiyar Reyimbaevich ekinshi, Qońırat rayonı «Qaraqalpaqstan» qalasha puqaralar jıyını hákim járdemshisi Ametova Jamila Janibekovna birinshi, «Eń jaqsı jaslar jetekshisi» tańlawında Ózbekstan Respublikası Jaslar agentligi Taqıyatas rayon bóliminiń «Xalıqlar-doslıǵı» máhelle puqaralar jıyınındaǵı jaslar jetekshisi Joldasbaev Sultanbek Qonıratbay ulı úshinshi, Ózbekstan Respublikası Jaslar agentligi Ámiwdárya rayon bóliminiń «Qilichboy» awıl puqaralar jıyınındaǵı jaslar jetekshisi Otamuratov Jasurbek Qurbonboy ulı ekinshi, Ózbekstan Respublikası Jaslar agentligi Qońırat rayon bóliminiń «Mińjarǵan» máhelle puqaralar jıyınındaǵı jaslar jetekshisi Mambetyarova Ulbosin Musatdin qızı birinshi,  «Eń jaqsı hayal-qızlar belsendisi» tańlawında Taxtakópir rayonı «A.Adilov» awıl puqaralar jıyını hayal-qızlar belsendisi Baxbergenova Kamshat Shoxanovna úshinshi,  Shomanay rayonı «Mamıy» awıl puqaralar jıyını hayal-qızlar belsendisi Salieva Nargiza Zinullaevna ekinshi, Beruniy rayonı «Qızılqala» awıl puqaralar jıyını hayal-qızlar belsendisi Nurimbetova Nargiza Davletbaevna birinshi orınlardı qolǵa kirgizdi.

Jeńimpazlarǵa diplom hám aqshalay sıylıqlar tapsırıldı.

Tańlawda birinshi orındı iyelegenler respublika kóleminde ótkeriletuǵın final basqıshqa jollama aldı.