Усы жыл 5-октябрь күни Нөкис қаласындағы Қарақалпақ мәмлекетлик жас тамашагөйлер театрында республикамызда Ҳаял-қызлардың машқалаларын системалы түрде шешиў, оларды социаллық жақтан қоллап-қуўатлаў бойынша республикалық комиссиясы тәрепинен өткерилип киятырған «Ең жақсы сектор баслығы», «Ең жақсы мәҳәлле баслығы», Ең жақсы ҳәким жәрдемшиси», «Ең жақсы жаслар жетекшиси», «Ең жақсы ҳаял-қызлар белсендиси» ҳәм «Ең үлгили жумыс бериўши ҳаял» таңлаўларының Қарақалпақстан Республикалық басқышы жеңимпазларын сыйлықлаў мәресими болып өтти.

Илажда Қарақалпақстан Республикасы Жоқары Кеңеси баслығы А.Орынбаев, Қарақалпақстан Республикасы Министрлер Кеңеси баслығы Қ.Сариев, Өзбекстан темир жол ҳәм транспорт қурыўшылары кәсиплик аўқамы Республика Кеңесиниң баслығы Қ.Сабиров ҳәм Қарақалпақстан Республикасы Министрлер Кеңеси баслығының орынбасары, шаңарақ ҳәм ҳаял-қызлар комитети баслығы М.Ахмедова қатнасты.

Илажды Өзбекстан кәсиплик аўқамлары Федерациясының Қарақалпақстан Кеңесиниң баслығы У.Жалменов басқарып барды.

Буннан кейин Қарақалпақстан Республикасы Жоқарғы Кеңесиниң Баслығы А.Орынбаев ҳәм Өзбекстан темир жол ҳәм транспорт қурыўшылары кәсиплик аўқамы Республика Кеңесиниң баслығы Қ.Сабиров шығып сөйлеп, жыйналғанларды Президентимиздиң басшылығында елимизде ҳаял-қызларды социаллық қорғаў, олардың машқалаларын сапластырыў бойынша алып барылып атырған кең көлемли жумысларға тоқтап өтти.

Илажда атап өтилгениндей, Ҳаяллар машқалаларын системалы түрде шешиў, оларды социаллық қоллап-қуўатлаў бойынша республикалық комиссиясы, оның қурамындағы жумысшы топар ҳәм жуўаплы кәрхана, мәкеме, шөлкемлер тәрепинен елимиздиң аймақларында «Ҳаяллар дәптери»не киргизилген ҳаял-қызлардың машқалаларын шешиў, олардың бәнтлигин тәмийинлеў бағдарында бир қатар жумысларды алып бармақта. Атап айтқанда, жумыссыз, социаллық қорғаўға мүтәж ҳаял-қызларды кәсип-өнерге ҳәм исбилерменликке оқытыў, үй қапталы қыйтақ жерлеринен өнимли пайдаланыўға көмеклесиў, өзин-өзи бәнт етиў, кредитлер ажыратыў, майыплығы болған ҳаял-қызларға материаллық жәрдем көрсетиў, оларды турақ жай менен тәмийинлеў, турақ жайларын оңлап бериў ҳәм басқа да кең көлемли жумыслар алып барылды. Сондай-ақ, қарамағында бир ҳәм оннан көп биринши топар майып балалары болған жалғыз аналар, медициналық, ҳуқықый ҳәм психологиялық жәрдемге мүтәж ҳаял-қызлар әмелий қоллап-қуўатланбақта.

Ҳаял-қызлардың машқалаларын шешиў, оларды социаллық қоллап-қуўатлаўда мәмлекетлик уйымлардың жуўапкершилиги арттырылмақта. Өзбекстан кәсиплик аўқамлары Федерациясы тәрепинен бул ийгиликли ислерди әмелге асырыўда үлгили ҳәм турақлы жумыс алып барған жуўаплы хызметкерлерди хошаметлеп барыў жолға қойылды.

Халықтың социаллық жәрдемге мүтәж қатламларын қоллап-қуўатлап және усындай шаңарақларға материаллық ҳәм бийғәрез жәрдем көрсетип, сондай-ақ, елимизде гендер сиясаты ҳәм жәмийетлик-сиясий турмыста ҳаял-қызлардың ролин арттырыўға қаратылған жумысларды үлгили шөлкемлестирген кәрханалардың ҳаял-қыз басшыларын хошаметлеў ҳәм жумыс бериўшилердиң жумыс нәтийжелилигин арттырыў мақсетинде «Ең үлгили жумыс бериўши ҳаял», аймақлары абат ҳәм тыныш болған пуқаралар жыйынларының баслықлары арасында «Ең жақсы мәҳәлле баслығы», машқалаларды «Мәҳәлле кесиминде», «Шаңарақ кесиминде» үйрениў, оларды шешиўге көмеклесиў, пуқаралардың өзин-өзи басқарыў уйымлары ҳәм ўәкилликли мәкеме және шөлкемлер арасында шерикликти беккемлеў, аймақларды комплексли раўажландырыўды қоллап-қуўатлаў мақсетинде «Ең жақсы сектор басшысы»,  ҳәр бир қала, районлардағы ҳәр бир мәҳәлледе исбилерменликти раўажландырыў, халықтың бәнтлигин тәмийинлеў ҳәм камбағаллықты қысқарттырыў  мақсетинде «Ең жақсы ҳәким жәрдемшиси», жаслар машқалаларын мәҳәллелерде шешиў, оларды ўатанды сүйиўшилик руўхында тәрбиялаў, жаслардың бос ўақытларын мазмунлы шөлкемлестириў ҳәмде жаслар арасында жынаятшылықты кемейттириў мақсетинде «Ең жақсы жаслар жетекшиси», мәҳәллелерде ҳаял-қызлар ҳәм кексе әўлад ўәкиллери менен ислесиў системасын жаңа басқышқа алып шығыў, мәҳәлле кесиминде ислеўге жуўапкер болган шахслар искерлигин нәтийжели шөлкемлестириў ҳәм өз-ара шерикшиликти тәмийинлеў мақсетинде «Ең жақсы ҳаял-қызлар белсендиси» таңлаўлары жолға қойылды.

Дәслеп, таңлаўлардың қала ҳәм район басқышлары усы жылдың июль-август айларында өткерилип, «Ең үлгили жумыс бериўши ҳаял» таңлаўы бойынша 112, «Ең жақсы мәҳәлле баслығы» таңлаўы бойынша 256, «Ең жақсы ҳәким жәрдемшиси» таңлаўы бойынша 290, «Ең жақсы жаслар жетекшиси» таңлаўы бойынша 293, «Ең жақсы ҳаял-қызлар белсендиси» таңлаўы бойынша 268 ҳәм “Ең жақсы сектор басшысы” таңлаўы бойынша 48 талабанлар қатнасты.

Соннан кейин, сентябрь айында таңлаўлардың екинши – Қарақалпақстан аймақлық басқышы өткерилди.

Илажда жеңимпазларға сыйлықлар салтанатлы түрде тапсырылды.

«Ең үлгили жумыс бериўши ҳаял» таңлаўында үшинши орынды Қоңырат районы «WUNDERKIND IN KUNGRAD» мәмлекетлик емес мектепке шекемги билимлендириў мәкемеси баслығы Абдуллаева Дилноз Кенгесбаевна, екинши орынды Кегeйли районы «RUS-ISLAM-SULTAN» шаңараклық кәрханасы баслығы Раметова Айжамал Толыбаевна, биринши орынды Қарақалпақстан Республикасы майыплар жәмийетине қараслы «BERNINA NUKUS» шуба кәрханасы директоры Даулетиярова Паршагул Муратбаевна, «Ең жақсы мәҳәлле баслығы» таңлаўында үшинши орынды Кегейли районы «Гүжимтерек» мәҳелле пуқаралар жыйыны баслығы Жумамуратов Бахтияр Жадигерович, екинши орынды Нөкис қаласы «Наўқан бағ» мәҳелле пуқаралар жыйыны баслығы Айтбаева Замира Жолдашовна, биринши орынды Шымбай районы  «Бердақ» мәҳелле пуқаралар жыйыны баслығы Палванова Фатима Маратовна, «Ең жақсы сектор басшысы» таңлаўында үшинши орынды Хожели районы мәмлекетлик салық инспекцияси баслығы ўазыйпасын орынлаўшысы, 4-сектор басшысы Ниятуллаев Педебай Жумабаевич, екинши орынды Қораөзек районы прокуроры, 2-сектор басшысы Джолманов Нажимаддин Баймурзаевич, биринши орынды Қанлықөл районы ишки ислер бөлими баслығы, 3-сектор басшысы Урумбаев Фархат Турсынбаевич ийеледи.  Сондай-ақ, «Ең жақсы ҳәким жәрдемшиси» таңлаўында Төрткүл районы «Маказобод» мәҳәлле пуқаралар жыйыны ҳәким жәрдемшиси Кучкаров Акмалжан Икрамович үшинши, Шоманай районы «Мәденият» мәҳәлле пуқаралар жыйыны ҳәким жәрдемшиси Қыдырбаев Бахтияр Рейимбаевич екинши, Қоңырат районы «Қарақалпақстан» қалаша пуқаралар жыйыны ҳәким жәрдемшиси Аметова Жамила Жанибековна биринши, «Ең жақсы жаслар жетекшиси» таңлаўында Өзбекстан Республикасы Жаслар агентлиги Тақыятас район бөлиминиң «Халықлар-дослығы» мәҳелле пуқаралар жыйынындағы жаслар жетекшиси Жолдасбаев Султанбек Қоныратбай улы үшинши, Өзбекстан Республикасы Жаслар агентлиги Әмиўдәрья район бөлиминиң «Қиличбой» аўыл пуқаралар жыйынындағы жаслар жетекшиси Отамуратов Жасурбек Қурбонбой улы екинши, Өзбекстан Республикасы Жаслар агентлиги Қоңырат район бөлиминиң «Миңжарған» мәҳелле пуқаралар жыйынындағы жаслар жетекшиси Мамбетярова Улбосин Мусатдин қызы биринши,  «Ең жақсы ҳаял-қызлар белсендиси» таңлаўында Тахтакөпир районы «А.Адилов» аўыл пуқаралар жыйыны ҳаял-қызлар белсендиси Бахбергенова Камшат Шохановна үшинши,  Шоманай районы «Мамый» аўыл пуқаралар жыйыны ҳаял-қызлар белсендиси Салиева Наргиза Зинуллаевна екинши, Беруний районы «Қызылқала» аўыл пуқаралар жыйыны ҳаял-қызлар белсендиси Нуримбетова Наргиза Давлетбаевна биринши орынларды қолға киргизди.

Жеңимпазларға диплом ҳәм ақшалай сыйлықлар тапсырылды.

Таңлаўда биринши орынды ийелегенлер республика көлеминде өткерилетуғын финал басқышқа жоллама алды.