Бизге белгили, Республика бойынша «Бес баслама олимпиадасы» шеңберинде Мектепке шекемги ҳәм мектеп билимлендириўи министрлиги системасындағы билимлендириў мәкеме(мектеп)лери хызметкерлери арасында «Саламат денеде – сапалы билим» сүрени астында Өзбекстан кәсиплик аўқамлары Федерациясы кубоги спорт жарыслары болып өтпекте.

Өзбекстан Республикасы Президентиниң 2022-жыл 28-январьдағы ПФ-60-санлы Пәрманы менен тастыйықланған «2022-2026-жылларға мөлшерленген Жаңа Өзбекстанның раўажланыў стратегиясы»ның 67-статьясында белгиленген ўазыйпаларды әмелге асырыў, денетәрбия ҳәм спорт илажларына кеңнен қамтыў, олар арасында жарыслар шөлкемлестириў, спорт инфраструктурасын жақсылаў ҳәм зәрүр спорт инвентарьлары менен тәмийинлеў, хызметкерлердиң физикалық белсендилик дәрежесин арттырыў, билимлендириў мәкемелериндеги спорт секциялары ҳәм дөгереклериниң жумысын раўажландырыўға көмеклесиў, оқытыўшылардың бос ўақытларында спорт пенен шуғылланыў ушын шараят жаратыў мақсетинде Өзбекстан кәсиплик аўқамлары Федерациясы, Өзбекстан Республикасы мектепке шекемги ҳәм мектеп билимлендириў министрлиги, Өзбекстан Республикасы Спорт министрлиги ҳәмде Өзбекстан жаслар ислер агентлиги тәрепинен тастыйықланған қоспа қарарларының орынланыўын тәмийинлеў бойынша Қарақалпақстан Республикасында да спорт жарыслары даўам етпекте.

Өзбекстан билимлендириў ҳәм илим хызметкерлери кәсиплик аўқамы район (қала)лық бөлимше кеңеслери ҳәм жуўапкер шөлкемлер менен биргеликте «Саламат денеде – сапалы билим» сүрени астында Мектепке шекемги ҳәм мектеп билимлендириўи министрлиги системасындағы билимлендириў мәкеме(мектеп)лери хызметкерлери арасында спорттың футбол, волейбол, стол тенниси, шахмат-шашка түрлери бойынша секторлар ҳәм район (қала)лық басқышлары болып өтти.

Бунда Қарақалпақстан Республикасы Мектепке шекемги ҳәм мектеп билимлендириўи министрлиги системасындағы 701 билимлендириў мәкеме (мектеп)лерде биринши сектор басқышында 17018 хызметкер ҳәм екинши район(қала) басқышында 2202 хызметкердиң қатнасыўы тәмийинленип, жеңимпазлар Өзбекстан кәсиплик аўқамлары тәрепинен диплом ҳәм саўғалар менен сыйлықланды. Ҳәр бир спорт түри бойынша район(қала)да 1-орынды алған жеңимпаз(команда)лар үшинши жуўмақлаўшы басқышында қатнасыў ҳуқықын қолға киргизди.

Жарыстың жуўмақлаўшы Қарақалпақстан Республикасы финал басқышы усы жылдың 7-май күни болып өтеди.