Nókis yuridika texnikumında «Basshı hám jaslar» ushırasıwı Ózbekstan mámleketlik mekemeler hám jámiyetlik xızmeti xızmetkerleri kásiplik awqamı Qaraqalpaqstan Keńesi baslıgı D.Kutlımuratova, Ózbekstan kásiplik awqamları Federaciyasınıń Qaraqalpaqstan Keńesi baslıǵınıń jaslar máseleleri boyınsha másláhátshisi N.Aliev xamde Nókis yuridik texnikumi baslanǵısh kásiplik awqam shólkemi baslıǵı S.Xojaxmetova, texnikum jasları qatnasında ótkerildi.

Ushırasıwda Ózbekstan mámleketlik mekemeler hám jámiyetlik xızmeti xızmetkerleri kásiplik awqamı Qaraqalpaqstan Keńesi baslıgı D.Kutlımuratova kiris sóz benen baslap berdi.

Elimizde jaslarǵa bolǵan itibar mámleketlik siyasattıń baslı baǵdarlarınıń birine aylanıp, olardıń pikir hám baslamaların qollap-quwatlaw, mashqalaların óz waqtında sheshiw maqsetinde keń kólemli jumıslar ámelge asırılıp atırganlıgı xamde Prezidentimizdiń baslaması menen hár hápteniń piyshembi kúnin “Jaslar kúni” dep belgilengenligin ayırıqsha aytıp ótti. Usı baslama sheńberinde barlıq orınlarda «Basshı hám jaslar» ushırasıwı keńnen belgilenip atır.

Ózbekstan Respublikası Prezidentiniń Jaslarǵa baylanıslı mámleket siyasatı haqqındaǵı Nızamında anıq etip belgilep ótilgenindey, jas áwladtı hár tárepleme qollap-quwatlaw, olardıń mámleket hám jámiyet aldındaǵı iskerligin asırıw maqsetinde “Kelajak bunyodkori” medalı, “Mard wǵlon” mámleket sıylıqları hámde qızlarımız ushın «Zulfiya» atındaǵı mámleketlik sıylıqları  jaslarımız ushın engizilgenin maqtanısh penen aytıp ótti, bunda jaslarımız qızıǵıwshılıqları boyınsha sanlı texnologiya, ilim-pán, kórkem-óner, mádeniyat, sport hám taǵıda basqa baǵdarlarda erisken jetiskenliklerin qollap-quwatlaw xakkında, «Jaslar isbilermenligin mámleket tárepinen qollap-quwatlaw»da isbilermen jaslarǵa 100 million sumǵa shekem jeńilletilgen kreditler ajıratılıp atırǵanlıǵı haqqında maǵlıwmatlar berip ótti.

Soń sózge Ózbekstan kásiplik awqamları Federaciyasınıń Qaraqalpaqstan Keńesi baslıǵınıń jaslar máseleleri boyınsha másláhátshisi N.Aliev shıǵıp sóylep, eń dáslep ol Ózbekstan kásiplik awqamı jaslar arasında qanday túsinikke iye ekenligi haqqında soraldı hám jıynalǵan jaslarǵa hár bir mámleketlik mekemeler hám jámiyetlik xızmeti xızmetkerleri jumıs orınlarda jámáátlik shártnama hám miynet shártnamalar dúziletuǵınlıǵı, miynet hám jámáátlik shártnamalarınıń dúziu tártipleri, xızmetkerlerdiń mápi nızamlı qorǵalıwı haqqında jıynalǵanlarǵa keńnen aytıp ótti.

Prezidentimiz tárepinen jaslarǵa qaratılıp atırǵan joqarı itibar, olardıń bilim alıwı, kásip-óner iyelewi hám óz potencialın kórsetiwi ushın jaratılıp atırǵan imkaniyatlardan keńnen durıs hám maqsetli paydalanıw kerekligin túsindirdi.

Ushırasıw dawamında usı texnikumda bilim alıp atırǵan bir qatar jaslarǵa ásirese belsendilik kórsetip atırǵan oqıwshı jaslarǵa Ózbekstan mámleketlik mekemeler hám jámiyetlik xızmeti xızmetkerleri kásiplik awqamı Qaraqalpaqstan Keńesi tárepinen estelik sawǵaları tapsırıldı hám jaslardıń pikir-usınısları, mashqalaları tıńlandı hám «Basshı hám jaslar» ushırasıwlar óz waqtında sheshim tabıw imkaniyatın bermekte.