Usı jıldıń 27-aprel kúni, Ájiniyaz atındaǵı Nókis pedagogika institutı imaratında 28-aprel «Pútkil dúnya júzlik miynetti qorǵaw kúni»ne baǵdarlanǵan «Salamat psixologik-sociallıq jumıs ortalıǵın támiyinleyik» ataması astında keń túrde hám kóterińki tárizde is-ilajlar ótkerilmekte.

Is-ilajlar Ózbekstan kásiplik awqamları Federaciyası Qaraqalpaqstan Keńesiniń baslaması menen ótkerilip atırǵan bolıp, bul is-ilajda Ózbekstan kásiplik awqamları Federaciyası, Qaraqalpaqstan Respublikası Bántlik hám kambaǵallıqtı qısqartırıw ministrligi, Bas shıpakerlik-sociallıq ekspertizası, Qaraqalpaqstan Respublikası Ayrıqsha jaǵdaylar basqarması, «Uzbekinvest» eksport-import qamsızlandırıw kompaniyası Qaraqalpaqstan Respublikası filialı hámde kárxana, mákeme hám shólkem xızmetkerleri qatnasıp atır.

Is-ilajlardıń ashılıwı, 2026-jıl 27-aprel kúni baslandı hámde is-ilaj qatnasıwshıları miynetti qorǵaw barısında paydalanılatuǵın kórgizbeli qurallar menen tanısıp bolǵan soń, Ájiniyaz atındaǵı Nókis pedagogika institutı imaratınıń májilisler zalında 28-aprel «Pútkil dúnya júzilik miynetti qorǵaw kúni»ne baǵdarlanǵan dógerek sáwbetine qatnaspaqta.

Dógerek sáwbetiniń maqseti, Salamat psixologik-sociallıq jumıs ortalıǵın támiyinlew bolıp, salamat psixologik-sociallıq jumıs ortalıǵı – jámááttegi múnásibetler, jumıs sharayatı hám ulıwma ruwxıy atmosferanıń jıyındısı bolıp tabıladı.

Házirgi waqıtta qarxana hám shólkemler aldında úlken wazıypalar turıptı. Biraq itibardı qaratıw tiyis bolǵan jaǵdaylardan biri – hár qanday jetiskenlik artında insan miyneti turadı. Eger insan ózin jumıs ornında baxıtlı hám erkin sezine almasa, ol joqarı nátiyjelerge erise almaydı.

Eger jumıs ornında bárshe ushın unamlı ortalıq jaratılǵan bolsa, bul bir qatar nátiyliliklerge alıp keledi. Atap aytqanda, jumıs ónimdarlıǵı asadı, xızmetkerler ortasında isenim bekkemlenedi, stress hám sharshawlar kemeyedi. Sonday-aq, bunday ortalıq jaratıwshańlıqtı qoshametleydi hám jańa idealardıń payda bolıwına xızmet etedi.

Álbette, bunday ortalıq óz-ózinen payda bolmaydı. Onı jaratıwda administraciyanıń ornı júdá úlken. Administraciya ádil, ashıq hám qollap-quwatlawshı bolıwı lazım. Xızmetkerlerdiń pikirin tıńlawı, olardı qoshametlew hám mashqalalardı óz waqtında sheshiw tiyis.

Dógerek sáwbetiniń juwmaǵında Ózbekstan kásiplik awqamları Federaciyası Prezidiumınıń 2017-jıl 20-noyabr kúngi 8-108 “s” sanlı qararına tiykar, miynet qorǵawı hám qáwipsizligi boyınsha jámáátlik qadaǵalawın shólkemlestiriw boyınsha Respublika kórik-tańlawınıń Qaraqalpaqstan Respublikası basqıshında jeńimpaz bolǵanlar qımbat bahalı sawǵalar hám diplomlar menen sıylıqlandı.