2026-jıl 24-aprel kúni Nókis qalası 1-sanlı sport mektebinde “Bes baslama olimpiadası” sheńberinde densawlıqtı saqlaw ministrligi sistemasındaǵı xızmetkerler arasında “Salamat denede – sapalı medicina” súreni astında Ózbekstan kásiplik awqamları Federaciyası kubogi sport jarıslarınıń Qaraqalpaqstan Respublikası basqıshı ótkerildi.

Ózbekstan Respublikası Prezidentiniń 2022-jıl 28-yanvardaǵı PF-60-sanlı Pármanı menen tastıyıqlanǵan «2022-2026-jıllarǵa mólsherlengen Jańa Ózbekstannıń rawajlanıw strategiyası» 67-maqsetinde belgilengen wazıypalardı ámelge asırıw, dene tárbiya hám sport penen turaqlı shuǵıllanıwshılar sanın asırıw, densawlıqtı saqlaw shólkemleri xızmetkerlerin sport ilajlarına keń qamtıw, olar arasında jarıslar shólkemlestiriw, xızmetkerlerdiń fizikalıq belsendiligin asırıw maqsetinde Ózbekstan kásiplik awqamları Federaciyasınıń Qaraqalpaqstan Keńesi, Qaraqalpaqstan Respublikası Densawlıqtı saqlaw ministrligi, Qaraqalpaqstan Respublikası Sport ministrligi hámde Ózbekstan jaslar isler agentligi Qaraqalpaqstan Respublikası basqarmas tárepinen tastıyıqlanǵan qospa qararǵa tiykar “Salamat denede – sapalı medicina” súreni astında Kásiplik awqam kubogi sport jarıslarınıń Qaraqalpaqstan Respublikası basqıshı bolıp ótti.

Sport jarısları Nókis qalası 1-sanlı sport mektebi, Qaraqalpaqstan medicina institutı, Berdaq atındaǵı Qaraqalpaq mámleketlik universiteti hámde Jaslar orayında shólkemlestirildi.

Ilajda Ózbekstan kásiplik awqamları Federaciyası baslıǵı orınbasarı, Qaraqalpaqstan Keńesi baslıǵı U.Jalmenov, Qaraqalpaqstan Respublikası Densawlıqtı saqlaw ministri orınbasarı T.Sarbaev, Qaraqalpaqstan Respublikası Sport ministri E.Qutıbaev, Den-sawlıqtı saqlaw xızmetkerleri kásiplik awqamınıń Qaraqalpaqstan Respublikalıq keńesi baslıǵı L.Baybosınova, Ózbekstan jaslar isler agentligi Qaraqalpaqstan Respublikası basqarması wákilleri, tarawlıq kásiplik awqamları Qaraqalpaqstan Respublikası Keńesi baslıqları, juwaplı shólkemlestiriwshileri hámde tiyisli shólkemler wákilleri qatnastı. Jarıstıń ótken basqıshlarında 2 mıń 174 densawlıqtı saqlaw xızmetkerlerdiń qatnası támiyinlenip, Qaraqalpaqstan Respublikası basqıshında jeńimpaz bolǵan komandalardan 493 xızmetkerler sporttıń ǵalabalıq túrleri mini-futbol, shaxmat, shashka, stol tennisi hámde voleybol túrleri boyınsha óz-ara kúsh sınastı.

Kún dawamında sport jarısları qızǵın ótip hám tájiriybeli tóreshiler tárepinen hár bir sport túrinen jeńimpazlar hám ulıwma komandalıq esapta utıp shıqqan jeńimpazlardı anıqladı.

Ulıwma komandalıq esapta birinshi orındı iyelep jeńimpaz bolǵan komandaǵa “Ózbekstan kásiplik awqamları Federaciyası kubogi” hámde
30 million sum pul sıylıǵı tapsırıldı.

Sonday-aq, jeńimpaz bolǵan komandalarǵa hámde túrli nominaciya iyelerine Ózbekstan kásiplik awqamları Federaciyasınıń Qaraqalpaqstan Keńesi tárepinen diplom hám sawǵalar tapsırıldı.