Búgingi kúnde kásiplik awqamlarınıń mámleketimizdiń sociallıq-siyasiy turmısındaǵı ornı artıp barmaqta. Olar miynetkesh puqaralardıń huqıq hám erkinlikleri hám nızamlı máplerin isenimli támiyinlew, miynet jámááti aǵzaların sociallıq-ekonomikalıq jaqtan qollap-quwatlawda belsendilik kórsetpekte.

Áyne sol maqsette Ózbekstan kásiplik awqamları Federaciyası tárepinen miynetkeshlerdiń múrájatların tıńlap, ornında saplastırıw, Federaciyaǵa kelip túsip atırǵan múrájatlardıń qayta-qayta tákirarlanıwınıń aldın alıw hámde Jańa Ózbekstanıń jańa kásiplik awqamlarında alıp barılıp atırǵan reformalar menen ilaj qatnasıwshıların xabardar etiw maqsetinde usı jıldıń 5-fevral kúni Berdaq atındaǵı qaraqalpaq mámleketlik universiteti májilisler zalında “Ashıq esikler kúni” hám “Kóshpeli qabıllaw” ilajı shólkemlestirildi.

Ilajda Ózbekstan kásiplik awqamları Federaciyası baslıǵınıń orınbasarı, Miynet inspekciyasınıń baslıǵı Qobiljon Kirgizaliev, Miynet inspekciyasınıń múrájatlar menen islesiw sektorınıń baslıǵı Rzaeva Guzalya Turgunbaevna, birge islesiwshi shólkemler wákilleri, tarawlıq respublikalıq keńes, birlesken kásiplik awqamı komitetiniń baslıqları, juwapker shólkemlestiriwshiler, qalalıq hám rayonlıq keńesleri hám baslanǵısh kásiplik awqamı komitetiniń baslıqları, jańadan saylanǵan kásiplik awqamı belsendileri hámde ǵalaba xabar wákilleri qatnastı.

Ilajda 2025-jıl 17-oktyabr kúni Ózbekstan Respublikası Prezidenti Shavkat Mirziyoev kásiplik awqamlarınıń belsendileri hám nuraniyleri menen ushırasqanı, ushırasıw dawamında mámleketimiz basshısı taraw wákilleri menen qızǵın sáwbetleskeni, olardıń usınıs hám baslamaların tıńlaǵanı, sonday-aq bul sóylesiw qaraqalpaqstanlılar ushın haqıyqıy quwanıshqa aylanǵanı, sebebi Qaraqalpaqstan Respublikasınıń eń shetki awılında «Bozataw» sanatoriyası paydalanıwǵa tapsırılǵanı atap ótildi.

Qalaberse usı ushırasıwda Prezidentimiz kásiplik awqamları iskerligine joqarı baha beriw menen birge aldaǵı waqıtlarda orınlanatuǵın wazıypalar ámeliy mısallar járdeminde anıq kórsetip berilgenligi atap ótildi.

Sonday-aq, respublikamız aymaqlarında ótkerilip atırǵan “Ashıq esikler kúni” hám “Kóshpeli qabıllaw” ilajları bárshe ushın paydalı bolıp atırǵanlıǵı aytıp ótildi.

Onnan soń ilaj dawamında Ózbekstan kásiplik awqamları Federaciyası tárepinen sońǵı besh jıl dawamında alıp barǵan iskerligi hám erisken nátiyjeleri haqqında maǵlıwmat berildi.

Sonıńday, ilajda jańadan saylanǵan kásiplik awqam komiteti baslıqlarına óz jumısın ustav talapları tiykarında alıp barıwı, jámáátlik shártnamaları hám kelisimlerin qabıl etiwde miynet nızamshılıǵında belgilengeninen tısqarı qosımsha kepillikler hám jeńilliklerdi názerde tutıw, sonday-aq, kásiplik awqamlarınıń tiykarǵı wazıypası xızmetkerlerdi hár tárepleme sociallıq-ekonomikalıq hám huqıqıy jaqtan qollap-quwatlaw ekenligi boyınsha túsinikler berildi.

Ilaj sońında qatnasıwshılar óz-ara pikir almasıp, jumıs beriwshiler menen xızmetkerler arasındaǵı miynet qatnasıqlarında payda bolıp atırǵan mashqalalı máseleler boyınsha sorawlarına juwaplar aldı.