Ózbekstan kásiplik awqamları Federaciyasınıń Qaraqalpaqstan Keńesi tárepinen 2022-jıl 11-mart kúni “Kásiplik awqamları baslanǵısh shólkemler jumısların ustav talapları tiykarında alıp barıw” atamasındaǵı oqıw-seminar ótkerildi.

Oqıw-seminardıń tiykarǵı maqseti miynet etip atırǵan hár bir kásiplik awqamı aǵzalarınıń múnásip miynet shárayatlarınıń jaratılıp beriliwi, nızamlı huqıqlarınıń qorǵalıwı, miynetke múnásip haq tóleniliwi, jámáátlik shártnamaları dúziliwi hám olardıń orınlanıwı boyınsha qadaǵalawdıń ámelge asırılıwı, miynetti qorǵaw, mádeniy-aǵartıw, dene-tárbiya hám sport sawalandırıw tarawındaǵı nızamlı huqıq hám máplerin qorǵalıwına erisiw.

Oqıw-seminar taraw kásiplik awqamlarınan 34 jańadan saylanǵan baslanǵısh kásiplik awqam shólkem baslıqları hám belsendileri qatnasında Keńes májilisler zalında bolıp ótti.

Oqıw-seminar baǵdarlamasına tiykar Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov “Kásiplik awqam xızmetkerleri potencialın asırıw”, Shólkemlestiriw jumısları bólimi meńgeriwshisi G.Ilmuradova “Kásiplik awqam komiteti jumısların jobalastırıw, baslanǵısh shólkemlerde óz qararları, joqarı shólkemlerden kelgen hújjetlerdiń orınlanıwı boyınsha monitoringin alıp barıw”, Keńes miynetkeshlerdiń social-ekonomikalıq máplerin qorǵaw bólimi meńgeriwshisi P.Tóremuratov “Miynetkeshlerdiń sociallıq-ekonomikalıq máplerin qorǵawda kásiplik awqamlarınıń jumısı. Jámáátlik kelisimler hám shártnamalar hám olardı qabıl etiw, ámelge asırıw hám orınlanıwın qadaǵalaw. Xalıqaralıq Miynet Shólkemi Konvenciyaları boyınsha Ózbekstan Respublikasıń májbúriyatları haqqında”, Keńestiń miynet-huqıq inspektorı P.Tursınov “Kásiplik awqamlarınıń huqıqıy tiykarları. Miynet shártnaması dúziw, ózgertiw hám  biykar etiw tártibi”, Keńes mádeniy aǵartıw hám sport jumısları bólimi meńgeriwshisi G.Tlepov “Miynet jámáátlerinde mádeniy-aǵartıw, dene-tárbiya hám sport jumısların shólkemlestiriw”, Keńestiń miynetti qorǵaw boyınsha jetekshi qánigesi S.Orazımbetov “Kárxana hám shólkemlerde miynetti qorǵaw boyınsha qaǵıyda hám normalarına ámel etiw boyınsha jámáátshilik qadaǵalawın alıp barıw. Baxıtsız hádiyselerdiń aldın alıw”, Keńes qarjı bólimi meńgeriwshisi S.Ungarbaeva “Kásiplik awqam byudjeti qarjıların maqsetli sarıplanıwın qadaǵalaw”, “Miynetkeshlerdiń sanatoriyalarda den sawlıqların tiklewdi shólkemlestiriw” atamalarında teoriyalıq hám ámeliy shınıǵıwlar ótkerdi.

Oqıw-seminar juwmaǵında qatnasıwshılar óz-ara pikir almastı hám ótkerilgen oqıw-seminar boyınsha anketa sorawlarına juwaplar berdi.