Ózbekstan kásiplik awqamları Federaciyasınıń Qaraqalpaqstan Keńesi májlisler zalında 18-noyabr–Ózbekstan Respublikası Mámleketlik bayraǵı qabıl etilgenliginiń 33 jıllıǵı múnásibeti menen “Bayraǵım — meniń maqtanıshım” atamasında Máripat saatı ótkerildi.

Ilajda Ózbekstan kásiplik awqamları Federaciyasınıń Qaraqalpaqstan Keńesi baslıǵ orınbasarı M.Daniyarov hámde Ózbekstan Respublikası Din isleri boyınsha komitetiniń Qaraqalpaqstan Respublikası aymaqlıq basqarması bas qánigesi N.Jamalov sózge shıǵıp bayraq áyyemgiden hár bir xalıqta ǵárezsizlik, azatlıq, tınıshlıq hám turaqlılıq tımsalı bolıp kelgenligi, ásirese áwladlarımız jurt bayraǵın muqáddes bilip onı ardaqlap, kóz qarashıǵınday saqlanǵanlıǵı haqqında aytıp ótildi.

Bayraq ataması eski turkiy atama bolıp, mıń jıllar aldın da sonday mánide qollanılǵan. Tiltanıwshılardıń aytıwınsha bul qádimgi turkshede baziraq, badiroq, batiroq sózleriniń mánisinde de qollanılǵan. Yaǵnıy, bayraq bir el-úles, qáwimniń erkinlik belgisi bolıp, ol bálent jerlerge, ámeldarlar shatırına ornatıp, shanshıp (batırıp) qoyılǵan. Oni tuw, jalaw, sanıshqı atları menen ataǵan.

Tariyxımızda hukim súrgen túrli ata babalarımız, mámleketler de óz bayraqlarına iye bolǵan. Mısalı, eski Kókturk hanlıǵı, Amir Temur mámleketi bayraǵı aspan kók, qádimgi ata babalarımız bolǵan xunlardıń bayraǵı aq, Ǵaznawiyler mámleketi, Qoqan xanlıǵı bayraqları jasıl, Turkistan muxtoriyati bayraǵı kók hám qızıl reńlerde edi. Bayraǵımızdı qabıl etiwde, onda turaqlı reńlerdi belgilewde tariyxıy dástúrlerimizge súyengen halda ayrıqsha itibar berilgen.

Jaqın tariyxımızǵa názer salatuǵın bolsaq, 1990-jıldıń mart ayında ótken parlament sessiyasında elimizdiń mámleketlik belgileri davlat ramzlari haqqındaǵı másele dodalanǵan edi. Sol jıldıń 20-iyun kúni qabıl etilgen Ǵárezsizlik deklaraciyasında da Ózbekstan óz rawajlanıw jolın ózi belgilewi, bayraq, gerb, gimn sıyaqlı belgilerdi ózi shólkemlestiriwi belgilendi.

Watanımız ǵárezsizlikke erisken dáslepki waqıtta – 1991-jıldıń 18-noyabrde Mámleketlik bayraǵı haqqındaǵı nızam qabıl etildi. Usı nızamǵa kóre, bayraǵımız mámleketlik suverenitetiniń belgisi bolıp qaldı.

Búgin xalqımızdıń, jaslarımızdıń bayraqqa, milliy belgilerge tımsallarǵa bolǵan súyispenshiligi, sadıqlıǵı asıp baratırǵanın kórip, quwanadı adam.

Ózbekstan Respublikası bayraǵı qabıl etilgen kún bárshege múbárek bolsın!