Húrmetli Prezidentimiz tárepinen 2020-jıl 23-noyabrde Ózbekstan Respublikasınıń WRQ-648-sanlı «Ózbekstan kásiplik awqamları kúnin belgilew haqqında»ǵı nızam qabıl etildi. Oǵan bola, 11-noyabr – «Kásiplik awqamları kúni» dep belgilendi. Bul jańalıq elimizdegi altı yarım milionnan artıq kásiplik awqamları aǵzaları tárepinen joqarı húrmet penen kútip alındı.

Mámleketimiz basshısınıń mámleketlik emes hám kommerciyallıq shólkemlerge, ásirese, Bas nızamımızda jámáátlik birlespeleri sıpatında atap ótilgen kásiplik awqamlarına bolǵan itibarı nátiyjesinde mámleketimizde 11-noyabr – Ózbekstan kásiplik awqamları kúni sıpatında keń belgilenip kelinbekte.

11-noyabr – “Kásiplik auqamları kúni”n belgilew sheńberinde Ózbekstan kásiplik awqamları Federaciyasınıń Qaraqalpaqstan Keńesi tárepinen “Insan qádiri ushın, el-jurt baxtı ushın!” degen ideya astında usı jıldıń 7-noyabr kúni Qaraqalpaqstan mámleketlik jas tamashagóyler teatrında respublika basshıları, miynet veteranları hám kásiplik awqamları belsendileri qatnasıwında saltanatlı ilaj bolıp ótti.

Ilajǵa Senator, Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov, Qaraqalpaqstan Respublikası Joqarǵı Keńesi komitet baslıqları hámde ministrler qatnastı.

Ilajda Ózbekstan kásiplik awqamları Federaciyasınıń Qaraqalpaqstan Keńesi tárepinen 2024-jıldıń is jobasına muwapıq sonday-aq, «Jaslar hám biznesti qollap-quwatlaw jılı» is-ilajlarına muwapıq kásiplik awqamlarınıń Ustav talaplarınan kelip shıǵıp bir qatar jumısları haqqında aytıp ótildi.

Sonıń menen birge, Ózbekstan Respublikası Ministrler Kabinetiniń 2022-jıl 31-marttaǵı “Hayal-qızlar mashqalaların úyreniw hám olardı sheshiw dizimin ele de jetilistiriw is-ilajları haqqında”ǵı 145-sanlı Qararı tiykarında hayal-qızlardıń mashqalaları “máhállebay” úyrenip shıǵılıp, “Hayallar dápteri”n qáliplestiriw boyınsha 452 puqaralar jıyınlarında 2020-2024-jıllarda 181 952 hayalǵa ámeliy járdemler kórsetilip, jaǵdayın jaqsılawǵa erisildi.

Ilaj dawamında Qaraqalpaqstan Respublikası Joqarǵı Keńesi tárepinen 16 miynet veteranları hám kásiplik awqam belsendirleri Qaraqalpaqstan Respublikası mámleketlik sıylıǵları menen sıylıqlandı.

Sonday-aq, “11-noyabr – Ózbekstan kásiplik awqamları kúni» bayramı múnásibeti menen elimizdiń social-ekonomikalıq rawajlanıwına hám xalıqtıń turmıs dárejesin asırıwǵa, miynetkeshlerdiń huqıq hám máplerin qorǵawǵa hámde olardıń salamatlıǵın tiklewge, mádeniyat hám sporttı rawajlandırıwǵa qosıp atırǵan salmaqlı úlesi  ushın miynet veteranları hám kásiplik awqam belsendilerine Húrmet jarlıǵı hámde sawǵalar menen sıylıqlandı.

Bayram iláji ózgeshe ruxta bolıp ótip atır. Tınısh elge bayramlar jarasadı. Mine, neshe kúnlerden beri kásiplik awqamları kúni respublikamız boylap keń nıshalanıp atır. Bunda álbette, húrmetli Prezidentimiz baslamasınıń ornı bólek. Búgingi kúnge kelip, kásiplik awqamları xalqtın isenimine erisip atırǵan buwınǵa aylandı. Qalaberse, Jańa Ɵzbekstanda alıp barıp atırılǵan ádil siyasat halqımızdı razı etiwden ibárat hám bul siyasat ózintolıq aqlap atır, – deydi miynet veteranı X.Ermagambetov.

Ilaj kórkem-óner ǵayratkeri atqarıwında koncert baǵdarlaması menen dawam etti.