Ózbekstan kásipik awqamları Federaciyasınıń Qaraqalpaqstan Keńesinde 27-iyun — Ǵalaba xabar quralları xızmetkerleri kúnine baǵıshlanǵan ilaj bolıp ótti.

Ilajda Ózbekstan kásipik awqamları Federaciyasınıń Qaraqalpaqstan Keńesi baslıǵı, Senator U.Jalmenov sózge shıǵıp, mámleketimizde alıp barılıp atırǵan keń kólemli reformalardı, elimizdegi sociallıq-siyasiy processlerdi, erisilip atırǵan nátiyjeli jumıslardı xalqımızǵa jetkiziw sonday-aq jarıtıwdaǵı mashaqatlı hám dóretiwshilik jumıslarında tabıslar tilep kásiplik bayramı menen qutlıqladı.

Sońǵı jıllarda mámleketimizde málimleme tarawın reformalaw, sóz erkinligin támiyinlew boyınsha ámelge asırılǵan keń kólemli reformalar nátiyjesinde xalıqtıń huqıqıy hám siyasiy bilimi arttı, dúnya qarası keńeydi, átirapta júz berip atırǵan waqıya-hádiyselerge múnásibeti ózgerdi, ǵárezsiz puqaralıq poziciyası qáliplesti. Bul, óz-ózinen, ǵalaba xabar qurallarınıń aldına jámáátshilik pikirin qáliplestiriw boyınsha oǵada áhmiyetli hám aktual wazıypalardı qoymaqta.

Ilaj dawamında televidenie, baspa hám elektron ǵalaba xabar qurallarında miynet etip atırǵan hámde birge islesiwde nátiyjeli jumıs alıp barıp atırǵan jurnalistler múnásip sıylıqlandı.

Baspasóz hám ǵalaba xabar quralları xızmetkerleriniń el-jurt mápi hám Watanımız potencialın bunnan-da joqarılarǵa kóteriw, jámiyette júz berip atırǵan áxmiyetli ózgerisler, baslı ideya hám baslamalardıń mánisin tezlik menen qalıs jarıtıw jolındaǵı juwapkershilikli jumısları atap ótilgen usı ilajda taraw wákilleri de sóz alıp, jurnalistlerge kórsetilip atırǵan joqarı itibar ushın ayrıqsha minnetdarshılıq bildirdi.