Ózbekstan kásiplik awqamları Ferderaciyasınıń miynet texnik inspekciyası tárepinen jámaatshilik kadaǵalaw nátiyjdesinde Qaraqalpaqstan Respublikası Qaraózek rayonlıq medicina birlespesinde – U. Qosekeeva sanitarka lawazımında islep júrip, 2013-jılı jumıs waqtında baxıtsız hádiysege ushıraw aqıbetinde nabıt bolǵan. U.Qosekeevanıń qaramaǵında qalǵan 2008-jıl tuwılǵan perzenti U.Bazarbaevaǵa tóleniwi tiyis bolǵan taban pulları usı kúnge shekem esaplap tólep berilmegengligi anıqlandı.

Ózbekstan Respublikası Ministrler Kabinetiniń 2005-jıl 11-fevraldaǵı 60-sanlı qararı «Xızmetkerlerge olardıń miynet wazıypaların orınlaw menen baylanıslı halda jaraqatlanıwı, kásip keselliklerine ushırawı yamasa salamatlıqtıń basqa túr zıyanlanıwı sebepli keltirilgen zıyandı tólew haqqında» ǵı qaǵıydasınıń IV-bólim 26-bántinde Xızmetker miynet jaraqatına baylanıslı halda qaytıs bolǵan jaǵdayda, jumıs beriwshi marhumnıń qaramaǵında bolǵan miynetke uqıpsız, sonday-aq on altı jasqa tolmaǵan shaxslarǵa yamasa marhum qaytıs bolǵan kúnge shekem onnan napaqa alıw huqıqına iye bolǵan shaxslarǵa, marhumnıń qaytıs bolıwınan soń tuwılǵan perzentine, sonday-aq ata-analarınan birewine, ómirlik joldasına yamasa shańaraǵınıń islemeytuǵın hám qaytıs bolǵannıń 3 jasqa tolmaǵan balaları, úkeleri, sińlileri yamasa aqlıqları baǵıw menen bánt bolǵan basqa aǵzasına, 16 hám onnan úlken jastaǵı oqıwshılar oqıw orınlarınıń kúndizgi bólimlerinde oqıwdı tamamlaǵanına shekem, biraq kóbi menen 18 jasqa shekem zıyan tólemin alıw huqıqına iye dep kórsetilgen.

Kásiplik awqamları miynet texnik-inspektorı tárepinen U.Bazarbaevaga tóleniwi tiyis bolǵan 17 134 346 sum taban pulları Qaraózek rayonlıq medicina birlespesi esabınan tólep bergiziliwine erisildi hámde puqara U.Bazarbaeva miynet inspekciyasına óz minnetdarshılıǵın bildirdi.