Qaraqalpaqstan Respublikası Ministrler Keńesi hám Ózbekstan kásiplik awqamları Federaciyasi Qaraqalpaqstan Keńesinde Ózbekstan transport, jol hám kapital qurılıs, qurılıs industriyası xızmetkerleri kásiplik awqamınıń keńeytirilgen jıynalısı bolıp ótti. Usı jıynalısta Qaraqalpaqstan Respublikası qurılıs ministrligi hám transport, kapital qurılıs, jol xojalıǵı kárxanaları hám shólkemleri basshıları, Ózbekstan transport, jol hám kapital qurılıs industriyası Respublika keńesi baslıǵı orınbasarı Baxadır Sultanov, usı keńestiń social qorǵaw máseleleri boyınsha bas qánigesi Shahista CHarieva, bas esapshı Shavkat Sadıkov, Ózbekstan kásiplik awqamları Federaciyasiniń Qaraqalpaqstan keńesi baslıǵı orınbasarı Muratbay Daniyarov hám Transport, jol hám kapital qurılıs, qurılıs industriyası Qaraqalpaqstan Respublikası baslıǵı Gúlmira Palwaniyazovalar qatnastı.

Jıynalıs barısında Ózbekstan transport, jol hám kapital qurılıs industriyası Respublika keńesi baslıǵı orınbasarı Baxadır Sultanov sózge shıǵıp, kásiplik awqam tárepinen usı tarawda 2023-jılda ámelge asırılǵan jumıslarǵa toqtaldı hám sociallıq qorǵaw, miynet kodeksine kiritilgen ózgerisler haqqında tolıq maǵlıwmatlar berdi.

Bunnan tısqarı, Qaraqalpaqstan Respublikası qala hám rayonlarındaǵı transport, jol, qurılıs industriyası tarawlarında iskerlik júrgizip atırǵan shólkemler xızmetkerleriniń, sonıń menen birge ekonomikanıń mámleketlik emes sektorındaǵı tazadan shólkemlestirilgen xojalıq júrgiziwshi subektlerde isleytuǵınlardıń social-ekonomikalıq máplerin hám huqıqların qorǵawdı jáne de kúsheytiw maqsetinde bul xojalıq júrgiziwshi subektlerde kásiplik awqam shólkemlerin dúziw boyınsha kásiplik awqamlarına ámeliy járdem beriwi kórsetip ótildi.

Jıynalıstıń ekinshi yarımında Transport, jol hám kapital qurılıs, qurılıs industriyası Qaraqalpaqstan Respublikası keńesi baslanǵısh shólkemler kásiplik awqam baslıqları, sonıń menen birge, tarawǵa tiyisli xızmetkerler qatnasıwındaǵı jıynalıs joqarıda kórsetilgen temaǵa baǵıshlandı hám keńes xızmetkerleri Sh.CHarieva, Sh.Sadıkovlar miynet dem alısı, aǵzalıq abzallıqları jóninde sóz etti.

Atap aytqanda, ótken 2023-jılda kásiplik awqam belsendileri xalıq ishine kirip bardı hám olardıń sociallıq jaǵdayın úyrenip, jámiyetshilik qadaǵalawın alıp bardı. Atap ótiw kerek, qurılıs obektleri, jol transport salasında ushırasıp atırǵan máselelerge sheshim tabıwda kásiplik awqamınıń tutqan ornı girewli.

Jıynalıs sońında qatnasıwshılar sociallıq qorǵaw, jámáátlik shártnaması hám napaqa máselesinde ózleri qızıqtırǵan sorawlarǵa juwaplar aldı.