Mámleketimizde jaratılǵan kúshli sociallıq qorǵaw nátiyjeleri tiyqarında Ózbekstan kásiplik awqamları tárepinen xalıqtıń járdemge mútáj qatlamların, imkaniyatı sheklengen shaxslardı, ásirese, basqalardıń qarawına mútáj jalǵız baslı kekselerdi mánzilli sociallıq qorǵawın kúsheytiw maqsetinde anıq ilajlar ámelge asırılmaqta.

11-noyabr – Ózbekstan kásiplik awqamları kúni múnásibeti menen Ózbekstan kásiplik awqamları Federaciyasınıń Qaraqalpaqstan keńesi tárepinen 2022-jıl 2-15-noyabr kúnleri aralıǵında «Jańa Ózbekstanda el áziz, insan áziz!» ideyasın ózinde jámlegen qayır-saqawat ilajları ótkerilmekte.

Usı jıldıń 4-noyabr kúni Ózbekstan kásiplik awqamları Federaciyasınıń Qaraqalpaqstan keńesi xızmetkerleri, Qaraqalpaq mámleketlik jas tamashagóyler teatrı jámááti hámde belsendeleri Nókis qalasında jaylasqan hayallar ushın “Miriwbet úyi”ndegi jasawshılarınan xabar aldı.

Ilajda Senator, Ózbekstan kásiplik awqamları Federaciyası baslıǵı orınbasarı, Ózbekstan kásiplik awqamları Federaciyasınıń Qaraqalpaqstan keńesi baslıǵı U.A.Jalmenov qatnasıp, usı úyde jasawshılar menen sáwbetlesti hám olardıń hal-jaǵdayları menen tanıstı.

Sonıń menen birge, “Miriwbet úyi”niń jasawshı ónermentlerdiń buyımları kórgizbesi qoyıldı, al háwesker jasawshılar atqarıwındaǵı koncert baǵdarlaması bárshege bayram keypiyatın baǵıshladı.

Qaraqalpaqstan keńesi tárepinen “Miriwbet úyi”ne jámi 20 mln sumlıq qáwenderlik járdemler kórsetildi.

Usınday ilajlar Ózbekstan kásiplik awqamları Federaciyasınıń buwındaǵı barlıq shólkemler tárepinen Ózbekstan Respublikasınıń bárshe walayatlarında ótkerilmekte.

Sonday-aq, usı jıl 5-noyabr kúni Shımbay rayonındaǵı erler ushın «Miriwbet úyi»nde Ózbekstan kásiplik awqamları Federaciyasınıń Qaraqalpaqstan keńesi tárepinen «Jańa Ózbekstanda el áziz, insan áziz!» ideyasın ózinde jámlegen qayır-saqawat ilajı ótkeriledi.