Ózbekstan Respublikası Prezidentininń 2022-jıl 14-fevraldaǵı Ózbekstan sportshılarınıń gezektegi jazǵı Olimpiya hám Paralimpiya oyınlarına nátiyjeli qatnasıw ushın tayarlıq jumısların muwapıqlastırıw xaqqında PQ-127 sanlı qararınıń orınlanıwın támiyinlew maqsetinde Ózbekstan kásiplik awqamları Federaciyasınıń Qaraqalpaqstan Keńesi hám Ózbekstan awır atletika federaciyasınıń Qaraqalpakstan bólimi menen birgelikte Qaraqalpaqstan Respublikasında kúshli sportshılardı Ózbekstan milliy saylandı komandasına jetkizip beriw maqsetinde sport jarısların birgelikte ótkerip kelmekte.

2022-jıl 10-11 may kúnleri Taqıyatas rayonı Pedagogika kolledji bazasında sporttıń awır atletika túri boyınsha 2006-2012 jılları tuwılǵan balalar-óspirimler sport mektepleri hám qániygelestirilgen balalar-óspirimler sport mektepleri sportshıları arasında Karaqalpaqstan Respublikası chempionatları ótkerildi. Jarıslarda Beruniy, Ámiwdarya, Qaraózek, Kegeyli, Taqıyatas, Bozataw, Taxtakópir rayonlarınan hám Nókis qalasınan 160 tan artıq óspirim balalar hám qız sportshılar qatnastı. Solardan 30 dan artıǵı qızlar.

Jarıs sońında jeńimpazlar hám 2 shi, 3 shi orınlardı iyelegen sportshılar Ózbekstan kásiplik awqamları Federaciyasınıń Qaraqalpaqstan Keńesi tárepinen qımbatbahalı estelik sawǵalar menen sıylıqlandı.

Jarıs jeńimpazları 25-28 may kúnleri Nókis qalasında bolıp ótetuǵın 2006-2012 jılları tuwılǵan balalar-óspirimler sport mektepleri hám qániygelestirilgen balalar-óspirimler sport mektepleri sportshıları arasında Ózbekstan chempionatına qatnasıw ushın jollama aldı.