Ózbekstan fermerleri Keńesi, Ózbekstan agrosanaat kompleksi xızmetkerleri kásiplik awqamı Respublikalıq Keńesi hám «Agrar taraw hayal-qızları» associaciyası menen birgeliktegi qararı tiykarında «Ibratlı hayal fermer» tańlawı shólkemlestirildi.

Tańlawdıń tiykarǵı maqseti awıl xojalıǵı tarawında nátiyjeli miynet etip atırǵan, óz jumısı menen basqalarǵa órnek bolıp atırǵan fermer hayal-qızlardı anıqlaw, olardıń miynetin múnásip xoshametlew, aldınǵı tájiriybelerin ǵalaba en jaydırıwdan ibarat. Sonday-aq, tańlaw hayal-qızlardıń agrar tarawdaǵı bilim hám kónlikpelerin jáne de arttırıw, olardı zamanagóy qatnas hám jańa baslamalar tiykarında islewge iytermelewde ayrıqsha áhmietke iye.

Rayonlarımızda da «Ibratlı hayal fermer» tańlawı kóterińki ruwxta ótkerildi. Onda awıl xojalıǵı tarawında jumıs alıp barıp atırǵan fermer hayal-qızlar qatnasıp, óz xojalıqlarında ámelge asırıp atırǵan jumısları, erisken nátiyjeleri, miynet tájiriybeleri hám keleshektegi rejeleri haqqında aytıp berdi.

Tańlaw dawamında qatnasıwshılar tek ǵana ózleriniń ámeliy jumısları menen emes, al fermerlik jumısında arttırǵan tájiriybeleri menen de ortaqlastı. Bul bolsa olar arasında óz-ara tájiriybe almasıw, jańa ideya hám baslamalardı qollap-quwatlaw ushın ózine tán pikirlesiw maydanın jarattı.

Rayon basqıshlarında jeńimpaz bolǵan qatnasıwshılar usı jıldıń 25-sentyabr kúni «Ibratlı hayal fermer» tańlawınıń Qaraqalpaqstan Respublikası basqıshında múnásip qatnasıp, ózleriniń fermerlik tarawındaǵı bay tájiriybesi, miynet jolı, erisken jetiskenlikleri hám aldıńǵı baslamaların kórsetti. Tańlaw juwmaǵı boyınsha:

1-orın – Salieva Palzada Jienbaevna Kegeyli rayonı «Arzıw» fermer xojalıǵınıń baslıǵı

2-orın – Dosımbetova Qızlargúl Kalimbetovna Ámiwdárya rayonı «Dosımbetova Q» fermer xojalıǵı baslıǵı

3-orın – Ashirova Tajigul Allanazarovna Ellikqala rayonı «Amirobod mardoni» fermer xojalıǵı basshıları Qaraqalpaqstan Respublikası basqıshında joqarı nátiyjelerge eristi.

Jeńimpazlardı sıylıqlaw máresiminde olardıń awıl xojalıǵı tarawındaǵı nátiyjeli miyneti, intakerligi hám belsendiligi ayrıqsha atap ótildi. Tańlawda múnásip orınlardı iyelegen fermer hayal-qızlar Ózbekstan kásiplik awqamları Federaciyasınıń Qaraqalpaqstan Keńesi baslıǵı U.A.Jalmenov hám Ózbekstan agrosanaat kompleksi xızmetkerleri kásiplik awqamı Respublika keńesiniń Qaraqalpaqstan Respublikası boyınsha juwapker shólkemlestiriwshisi E.E.Seytnazarovlar tárepinen I-II-III-dárejeli diplomların hám bahalı sawǵalar menen sıylıqlandı. Bul sıylıq fermer hayal-qızlardıń agrar tarawdaǵı pidayı miyneti hám erisken jetiskenliklerin múnásip xoshametlewge xızmet etedi.