Hár bir puqaranıń qáwipsiz hám múnásip sharayatlarda miynet etiwi mámlekettiń ekonomikalıq ósiwi hám sociallıq rawajlanıwınıń tiykarı bolıp esaplanadı. Usı múnásibet penen pútkil dúnyada bolǵanı sıyaqlı, elimizde de 28-aprel sánesi múnásibeti menen miynetti qorǵawǵa baǵıshlanıp, túrli ilajlar shólkemlestirilmekte. Atap aytqanda, Ámiwdárya rayonı Mádeniyat bóliminde «Qáwipsiz miynet tiykarları» atamasında áhmiyetli oqıw seminarı bolıp ótti.

Ilajda miynet nızamshılıǵı, qáwipsizlikti támiyinlew hám xızmetkerlerdiń huqıqların qorǵaw máseleleri dodalandı. Ózbekstan kásiplik awqamları Federaciyasınıń Qaraqalpaqstan Keńesiniń baslıǵı Uluǵbek Jalmenov miynetti qorǵawdaǵı jańa reformalar hám kásiplik awqamlarınıń roli haqqında tolıq maǵlıwmat berdi.

Sonday-aq, Mámleketlik miynet inspekciyası (M.Seydullaev, R. Shomuratov) hám kásiplik awqamlarınıń miynet texnik inspektorları (B. Utepbergenov, P. Abdiyazov) tárepinen tómendegi áhmiyetli temalar ashıp berildi:

Kárxanalarda qáwipsizlik sistemasın huquqıy hám texnikalıq jaqtan durıs shólkemlestiriw;

Jumıs orınlarındaǵı qáwip-qáterlerdiń aldınnan bahalaw hám saplastırıw;

Miynet shártnamalarına qatań ámel etiw, jumıs hám dem alıs waqıtların nızamlı belgilew;

Zıyanlı hám qáwipli jumıs sharayatlarında miynet etip atırǵan xızmetkerler ushın názerde tutılǵan jeńillikler.

Seminar juwmaǵı ashıqtan-ashıq sóylesiw hám qızǵın soraw-juwaplar ruwxında ótti. Shólkem basshıları hám miynetti qorǵaw wákilleri óndiris procesinde ushırasıp atırǵan mashqalalar jáne huqıqıy máseleler boyınsha taraw bilimpazlarınan anıq hám tiykarlanǵan juwaplar aldı. Bunday ilajlar hár bir jumıs ornında insan ómiri hám densawlıǵın isenimli saqlawǵa xızmet etedi.