14-yanvar – Ózbekstan Respublikası Watan qorǵawshıları kúni bayramı múnásibeti menen orınlarda salamat turmıs tárizin úgit-násiyatlaytuǵın ǵalabalıq sport ilajlarına ayrıqsha itibar qaratılmaqta.

Mine usınday ilajlardan biri Nókis qalasında bolıp ótti. Ózbekstan bilimlendiriw hám ilim xızmetkerleri kásiplik awqamı Nókis qalalıq bólimshesiniń baslaması menen usı jıldıń 14-yanvar kúni Nókis qalasındaǵı 32-sanlı ulıwma orta bilim beriw mektebiniń sport bazasında sporttıń Armrestling, Tas kóteriw, Arqan tartıw túrlerinen sport jarısı shólkemlestirildi.

Bul jarısta qalalıq bólimshe quramındaǵı ulıwma bilim beriw mákemelerinde miynet etip atırǵan xızmetkerler óz-ara kúsh sınastı.

Qızǵın báseki hám óz-ara mawasasız gúresler astında ótken bellesiwler xızmetkerlerdiń sportqa bolǵan qızıǵıwshılıǵın jáne de arttırıp, olardıń jeńiske bolǵan umtılısı hám jámáátlik ruwxın bekkemledi. Barlıq qatnasıwshılar óziniń jeńisi ushın juwapkershilik penen, awızbirshilikli hám shólkemlesken halda háreket etti.

Jarıs sońında jeńimpazlıqtı qolǵa kirgizgen qatnasıwshılar hám komandalar Ózbekstan bilimlendiriw hám ilim xızmetkerleri kásiplik awqamı Nókis qalalıq bóliminiń keńesi tárepinen tayarlanǵan diplom hám estelik sawǵaları menen sıylıqlandı. Bul ilaj tek ǵana bayram sawǵası emes, al xızmetkerlerdiń salamatlıǵın bekkemlew jolındaǵı áhmiyetli qádem boldı.