2025-jıl 18-aprel kúni Nókis qalası Jaslar orayında Ózbekstan kásiplik awqamları Federaciyasınıń Qaraqalpaqstan Keńesi, Qaraqalpaqstan Respublikası Sport ministrligi hámde Ózbekstan shaxmat Federaciyası Qaraqalpaqstan bólimi tárepinen tastıyıqlanǵan qospa qararǵa tiykar Ózbekstan kásiplik awqamları háreketiniń 120 jıllıq bayramına baǵıshlap sporttıń shaxmat túri boyınsha “Ózbekstan kásiplik awqamları Federaciyası kubogi” sport jarısınıń Qaraqalpaqstan Respublikası basqıshı bolıp ótti.

Ilajda Ózbekstan kásiplik awqamları Federaciyasınıń Qaraqalpaqstan Keńesi baslıǵı U.Jalmenov, Qaraqalpaqstan Respublikası Sport ministriniń orınbasarı A.Qalbaev, Ózbekstan shaxmat Federaciyası Qaraqalpaqstan bóliminiń atqarıwshı direktorı Z.Abipov hámde tarawlıq kásiplik awqamları Qaraqalpaqstan Respublikası Keńesi baslıqları, juwaplı shólkemlestiriwshileri hámde tiyisli shólkemler wákilleri qatnastı.

Jarıs Xalıq aralıq shaxmat Federatciyasınıń ámeldegi qaǵıydaları tiykarında, rapid baǵdarında áyeller hám er adamlar arasında ótkerildi. Hár bir jarıs 7 etap ta shveycariya sistemasında bolıp ótti. Qatnasıwshılarǵa oyın aqırına shekem 10 minut waqıt berildi, birinshi júriwden baslap hár júriwge 2 sekunddan waqıt qosıp barıldı.

Jarıstıń sheshiwshi, juwmaqlawshı basqıshında qala hám rayon basqıshlarında 52 jeńimpaz iyeleri Respublika basqıshına jollanba ushın óz-ara kúsh sınastı. Hár bir júriw, hár bir qarar shaxmattıń aqıl hám shıdamlılıq maydanı ekenligin taǵı bir mártebe kórsetdi.

Kún dawamında qızǵın ótken sport jarısında tájiriybeli tóreshiler tárepinen jeńimpazlar anıqladı.

Bunda:

Hayal-qızlar arasında 3-orındı Shımbay rayonı qánigelestirilgen mektebi oqıtıwshısı Bekmuratova Gulsauir Djalgasbaevna, 2-orındı Tórtkúl rayonı 17-sanlı ulıwma orta bilim mektebi oqıtıwshısı Doschanova Sadokat Allambergenovna, 1-orındı Taqıyatas rayonı sport mektebi treneri Toraeva Ayna Orazmuxammedovna, Erler arasında bolsa 3-orındı Nókis qalası 42-sanlı ulıwma orta bilim mektebi oqıtıwshısı Dilimbetov Salamat Kdırbaevich, 2-orındı «Qaraqalpaq suw támiynatı» AJ Bozataw filialı baslıǵı Baltabaev Murat Jumabaevich, 1-orındı Taqıyatas rayonı 3-sanlı ulıwma orta bilim mektebi oqıtıwshısı Kaypanov Rustem Perdebay uǵli jeńimpaz dep tabıldı.

Sonday-aq, Ózbekstan kásiplik awqamları Federaciyasınıń Qaraqalpaqstan Keńesi tárepinen túrli nominaciyalar boyınsha hámde  jeńimpazlarǵa diplom hám qımbat bahalı sawǵalar tapsırıldı. Birinshi hám ekinshi orındı alǵan jeńimpazlar 28-30 aprel kúnleri Tashkent qalasında ótkeriletuǵın “Ózbekstan kásiplik awqamları Federaciyası kubogi” jarısında qatnasadı.