Prezidentimizdiń basshılıǵında búgingi kúnde elimizde hayal-qızlarǵa ǵamqorlıq kórsetiw, olardı hár tárepleme qollap-quwatlaw, siyasiy, sociallıq-ekonomikalıq turmıstaǵı belsendiligin arttırıwǵa ayrıqsha itibar qaratılmaqta.

Hayal-qızlardı hár tárepleme qollap-quwatlaw, olardı qádirlew hámde shańaraqlardı bekkemlew, sonday-aq jas áwladtı milliy qádiriyatlarımızdı húrmet etiw ruwxında tárbiyalawdaǵı rolin hám sociallıq belsendiligin asırıw, sonıń menen birge barlıq tarawlarda nátiyjeli miynet etip atırǵan belsendi hayal-qızlardı xoshametlew, úlgili kásiplik maqtanıshı menen birge órnek bolǵan miynet veteranların qádirlep-qásterlew jumıslarında kásiplik awqamları da belsene qatnaspaqta.

Jámáátlik kelisimleri hám shártnamaları arqalı mámleketlik baǵdarlaması tiykarında, “Kásiplik awqamları-hayal-qızlarǵa” akciyası sheńberinde 3835 hayal-qızlarǵa sawǵalar tapsırıldı.

2024-jıl 6-mart kúni Ózbekstan kásiplik awqamları Federaciyasınıń Qaraqalpaqstan Keńesi tarepinen 8-mart Xalıqaralıq hayal-qızlar kúni múnásibeti menen «Hayalları qádir tapqan el» atamasında bayram keshesi bolıp ótti.

Onda respublikamızdıń qala hám rayonlarınan kelgen nuranıy analar, jámiyetlik turmıstıń barlıq tarawlarında belsene qatnasıp kiyatırǵan hayal-qızlar, túrli ministrlik hám mákemelerdiń wákilleri qatnastı.

Ilajdı Senator, Ózbekstan kásiplik awqamları Federaciyası baslıǵınıń orınbasarı, Qaraqalpaqstan Keńesi baslıǵı U.A.Jalmenov ashıp, Prezidentimiz Sh.Mirziyoev hayal-qızlarımızdıń salamatlıǵı jolında hám jámiyette óz ornın belgilewinde baslamaları ilgeri súrilgenligi sonıń menen birge mámleketimizde hayal-qızlar ushın kóplegen imkaniyatlar jaratıp berilgen,olar qaysı tarawda bolsa da ózleriniń miynet súygishligi, talapshańlıǵı arqasında erler menen teń qádem taslap atırǵanlıǵı haqqında aytıp ótti.

Bayram keshesi dawamında Watanımızdıń rawajlanıwı jolında jemisli miynet etip atırǵan, jámiyetlik turmıstıń barlıq tarawlarında pidákerlik kórsetip kiyatırǵan bir qatar hayal-qızlarǵa hám nuranıy anaları­mızǵa Ózbekstan kásiplik awqamları Federaciyasınıń Qaraqalpaqstan Keńesi tárepinen Húrmet jarlıǵı hám estelik sawǵalar menen sıylıqlandı.

Ilaj dawamında koncert baǵdarlaması hámmege kóterinki keypiyat baǵıshladı.