2023-jıl 15-fevral kúni Nókis qalasındaǵı Respublikalıq oyın túrleri hám jeńil atletika boyınsha qánigelestirilgen sport mektebi hámde Nókis olimpiya hám paraolimpiya sport túrlerine tayarlaw orayında ótkerilgen sport ilajında “Qol tobı” jarısınıń Qaraqalpaqstan Respublikalıq basqıshına qala hám rayonlardaǵı sport mektepleri oqıtıwshı xızmetkerleri hámde ǵalaba xabar quralları wákilleri qatnastı.

Jarıs qatnasıwshıların Ózbekstan mádeniyat, sport hám turizm xızmetkerleri kásiplik awqamı Respublikalıq keńesiniń Qaraqalpaqstan Respublikası boyınsha juwapker shólkemlestiriwshisi J.Ayapov hámde Qaraqalpaqstan Respublikası Jaslar siyasatı hám sport ministri w.w.a. A.Allanazarov sport jarısı qatnasıwshıların qızǵın qutlıqladı.

Ótkerilgen sport jarısında 25 komandalarda 250 ge shamalas sportshılar qatnastı.

Jarıs juwmaǵında jeńimpazlar Mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti tárepinen tayarlanǵan qımbat bahalı sawǵalar hám I-II-III-dárejeli diplomlar tapsırıldı.

Atap aytqanda, hayallar arasında 1-orındı Respublikalıq oyın túrleri hám jeńil atletika boyınsha qánigelestirilgen sport mektebi, 2-orındı Moynaq rayonı sport mektebi hámde 3-orındı Xojeli rayonı sport mektebi komandaları sıylı orınlardı iyeledi.

Al, erkekler arasında 1-orındı Respublikalıq oyın túrleri hám jeńil atletika boyınsha qánigelestirilgen sport mektebi, 2-orındı Nókis rayonı sport mektebi hám 3-orındı Taxtakópir rayonı sport mektebi komandaları sıylı orınlardı iyeledi.

Bunnan tısqarı hayallar arasında “Eń jası úlken qatnasıwshı” nominaciyası boyınsha Bozataw rayonı sport mektebinen M.Utewlieva, “Eń wqıplı qatnasıwshı” nominaciyası boyınsha Ellikqala rayonı sport mektebinen M.Babajanova, “Jeńiske bolǵan intası ushın” nominaciyası boyınsha Nókis qalası 1-sanlı sport mektebinen G.Baylepesova  hámde “Eń  jas qatnasıwshı” nominaciyası boyınsha Qanlıkól rayonı sport mektebinen R.Iliyasovalar jeńimpaz bolıp tabıldı.

Erkekler arasında “Eń jası úlken qatnasıwshı” nominaciyası boyınsha Shımbay rayonı sport mektebinen M.Bekimbetov, “Eń wqıplı qatnasıwshı” nominaciyası boyınsha Kegeyli rayonı sport mektebinen S.Bekpolatov, “Jeńiske bolǵan intası ushın” nominaciyası boyınsha Nókis qalası 1-sanlı sport mektebinen Ǵ.Shılmanov hámde “Eń  jas  qatnasıwshı” nominaciyası boyınsha Qanlıkól rayonı sport mektebinen Z.Allabaevlar jeńimpaz bolıp tabıldı.

Ótkerilgen “Qol tobı” sport jarısınıń Qaraqalpaqstan Respublikası basqıshında sıylı 1-orındı iyelegen Respublikalıq oyın túrleri hám jeńil atletika boyınsha qánigelestirilgen sport mektebiniń hayallar hám erkekler komandası 2023-jıldıń 24-26-fevral kúnleri aralıǵında Tashkent wálayatınıń CHirchiq qalasındaǵı Ózbekstan dene tárbiya hám sport universtitetiniń sport bazasında ótkeriletuǵın Final basqıshına jollama aldı.

Sport ilajı qatnasıwshılarına Qaraqalpaqstan Respublikası Mádeniyat hám turizm ministrligi tárepinen tayarlanǵan koncert baǵdarlaması qoyıp berildi.