Ózbekstan kásiplik awqamları Federaciyasınıń «Ishonch» hám «Ishonch-Doverie» gazetaları redakciyası tárepinen 2022-jılı 31-oktyabr kúni Nókis qalasındaǵı «Jaslar orayı»nıń májilis zalında jergilikli baspa sóz redaktorlar, jurnalistler, kásiplik awqamları xızmetkerleri, belsendeleri hám ıqlasbentler menen ashıq-aydın pikirlesiw tárezinde «Ishonch» hám «Ishonch-Doverie» gazetalarınıń Qaraqalpaqstan Respublikasındaǵı kúnleri» dóretiwshilik ushırasıwı ótkerildi.

Ushırasıwdı Ózbekstan kásiplik awqamları Federaciyasınıń Qarakalpaqstan keńesiniń Shólkemlestiriw jumısları bólimi mengeriwshisi G.Ilmuradova kiris sóz benen ashıp, óz sózinde Ózbekstan kásiplik awqamları Federaciyasınıń «Ishonch» hám Ishonch-Doverie» gazetalarınıń elimiz ǵárezsizligi menen teńles ekenligin, usı dáwirler ishinde elimizde ámelge asırılıp atırǵan dóretiwshilik jumıslar, úlken joybarlardıń orınlanıwı menen tanısıw, xalıq penen pikir alısıwına, kásiplik awqamları háreketiniń rawajlanıwına, kásiplik awqamları tárepinen ámelge asırılıp atırǵan jumıslardı keń jámáátshilikke jetkeriwde salmaqlı úles qosıp kiyatırǵanlıǵına toqtap ótti.

Ushırasıwda «Ishonch» gazetasınıń bas redaktorı orınbasarı Botayarov Turdikul Suvonovich sózge shıǵıp, keyingi úsh jıl dawamında elimizdegi ózgerisler, ámelge asırılǵan jumıslar hám qolǵa kirgizgen tabıslar, aldımızǵa qoyǵan maqsetler haqqında, sonday-aq Ózbekstan kásiplik awqamlarındaǵı ózgerisler, “Ishonch” gazetasınıń basıp ótken jolı, tarıyxı hámde elimizde mámleketimiz tárepinen ǵalaba xabar qurallarına úlken dıqqat ajratılǵanlıǵı, jurnalistlik etikasi, redkollegiya aǵzalarınıń aldında turǵan wazıypalar hámde 2023-jılǵa «Ishonch» gazetasına jazılıw boyınsha tártip hám qaǵıydaları haqqında keń túrde aytıp ótti.

Sonnan, gazeta redakciyası tárepenin qatnasıwshılar arasında qızıqlı viktorina shólkemlestirilip, viktorina juwmaǵında jeńimpazlarǵa sawǵalar tapsırıldı.

Sonıń menen birge, ilaj katnasıwshılarǵa politolog Q.Rafikovtıń “Meniń Prezidentim” atamasında kitabı sawǵa etildi.

Ushırasıwda dóretiwshilik sheginisler bolıp, diskussiyalıq túrde ótkerildi, qatnasıwshılar tárepinen keleshekte gazeta elede qızıqlı, ǵalabalıǵın támiyinlewge qaratılǵan usınıs pikirlerin bildirdi hám bayanatshılarǵa sorawlar berip, tiyisli juwaplar aldı.

Ilajda aymaqlıq gazetalarınıń bas redaktorları, Qaraqalpaqstan teleradiokompaniyasınıń hámde keń jámáátshilik wákilleri hám kásiplik awqamlarınıń belsendileri qatnastı.