Usı jıldıń 12 iyun kúni Qaraqalpaqstan medicina institutı májilisler zalında Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası bólimshesiniń II esabat-saylaw konferenciyası bolıp ótti.

Konferenciya jumısında Ózbekstan densawlıqtı saqlaw xızmetkerleri kásiplik awqamı Respublikalıq keńesiniń baslıǵı F.Xanapiyaev, Ózbekstan kásiplik awqamları Federaciyası baslıǵınıń orınbasarı, Qaraqalpaqstan keńesi baslıǵı U.Jalmenov, Ózbekstan kásiplik awqamları Federaciyasınıń Qaraqalpaqstan Respublikası boyınsha wákili B.Sultonov, Qaraqalpaqstan Respublikası densawlıqtı saqlaw ministri orınbasarı G.Abdisametova, mirát etilgen miymanlar hám delegatlar qatnastı.

Konferenciyada Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesiniń 2021-jıl aprel-2025-jıl may ayları aralıǵındaǵı jumısları haqqındaǵı bayanatı tıńlandı. Bayanat dodalanıp bolınǵannan soń, keńestiń alıp barǵan jumısları bir awızdan “qanaatlandırarlı” dep bahalandı, sonday-aq tekseriw komissiyası esabatı tastıyıqlandı.

Esabat-saylawlardı ótkeriw haqqındaǵı Rejeniń 3.3.22-bántine muwapıq alternativlik tiykarda, jasırın dawıs beriw jolı menen Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi baslıǵı lawazımına Baybosınova Lizaxan Allambergenovna saylandı.

Sonıń menen birge Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi hám de tekseriw komissiyasınıń quramı hám tekseriw komissiyası baslıǵı saylandı.

Konferenciya sońında Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası bólimshesiniń kelesi bes jıllıq ushın tiykarǵı wazıypaları belgilenip alındı.