Jazǵı máwsim juwmaqlanıwı múnásibeti menen «Aq keme» dem alıw orayında jabılıw festivali bolıp ótti. Usı ilajda dem alıwshı balalar hám balalardıń jazǵı dem alıslarınıń qızıqlı hám mazmunlı ótiwin támiyinlegen 11 dem alıw orayınıń barlıq xızmetkerleri qatnastı hám xoshametlendi.

Festivalda Ózbekstan kásiplik awqamları Federaciyasınıń Qaraqalpaqstan keńesi baslıǵı, senator Ulıqbek Jalmenov, Balalardıń dem alıwın hám sawallandırıwın shólkemlestiriw departamentiniń Qaraqalpaqstan basqarması baslıǵı Satbay Otewliev, rayon hákimi Baxtiyar Menglibekov hám basqalar sózge shıǵıp, jıynalǵanlardı Ózbekstan Respublikası Ǵárezsizliginiń 33 jılık bayramı hám máwsimniń shıraylı juwmaǵı menen qutlıqlap ótti.

Ilajda bárshe oraylardıń direktorları, jetekshileri, tárbiyashıları, tiyisli ministrlik, basqarma juwapkerleri, ǵalaba xabar qural wákilleri, sonday-aq, balalar hám olardıń ata-anaları qatnastı. Máwsim dawamında barlıq dem alıw oraylarınıń xızmetkerleri ózleriniń joqarı miynetleri hám pidakerlik jumısları menen balajanlardıń dem alısların jarqın, tereń mazmunlı hám qáwipsiz ótkeriwge úles qostı.

Dem alıw oraylarda balalar tek ǵana dem alıp qoymastan, óz talantların kórsetiw imkaniyatlarınan paydalanıw, jańa bilimler alıw hám jańa doslar arttırıwları ushın ájayıp múmkinshilikler jaratıldı. Usı máwsim dawamında balalarǵa qızıqlı hám paydalı master klass sabaqları, bilimler belessiwleri, pán olimpiada hám sport jarısları, snday-aq, túrli mádeniy ilajlar ótkerilip barıldı. Barlıq miynetsúyer pedagog tárbiyashılar hám jetekshiler perzentlerimizdiń jazǵı dem alısların jarqın hám yadta qalarlıqtay ótiwinde ayanbay miynet etti.

Ilaj dawamında 11 dem alıw oraylarınıń barlıq xızmetkerleri pidaylıq penen miynet kórsetkeni ushın múnásip xoshametlenip barıldı. Hár bir xızmetkerdiń máwsim dawamında kórsetken miyneti, juwapkershiligi hám belsendiligi ushın sawǵalar hám maqtaw jarlıqları menen marapatlandı.

Ilajda sózge shıqqanlar barlıq xızmetkerlerdi bul máwsimdi tabıslı juwmaqlaǵanları ushın xoshametlendi hám olardıń keleshekte de balalar menen islesiwde tabıslar tiledi.